«Tomırıs» fılminiń prodúseriniń iz-tússiz joǵalǵanyna úsh kún boldy. Joǵalyp ketken Anna Chakırtovanyń qyzy Kamıla Nuǵmanovanyń aıtýynsha, kesheli beri 15 márte túrli nómirler habarlasyp prodúserdi kórgenderi aıtyp jatyr.

«Olardyń kóbi erigip júrgender. Máselen, búgin bir nómir habarlasyp anamdy Arbat boıynan jas gıtarısterdiń janynan kórip qalǵanyn aıtty. «Onyń jasy 42-de. Jastardyń arasynda júrgen anam ekenine senimdisiz be?» dep surasam, qatelesip ketkenin aıtyp, tutqany qoıa salady. Mundaı qońyraýlar tym kóp», - dedi qyzy.

Tipti, kóripkelder de habarlasatyn kórinedi.

«Balgerler men kóripkelder de habarlasyp, anammen baılanysy joq dúnıelerdi aıtady», - dedi Kamılla.

Aıta keteıik, úsh kún buryn Almatyda «Tomırıs» fılminiń prodúseri Anna Chakırtova joǵalyp ketti.

Áıeldiń jaqyndarynyń sózinshe, Chakırtova 2 shilde kúni keshki saǵat 21.20-da úıinen shyǵyp ketip, sol kúıi oralmaǵan

«Sol kúni saǵat 20.00 shamasynda keńseden shyǵyp, úıge ketken. Jolda dári-dármek alý úshin dárihanaǵa kirdi. Ary qaraı úıge bardy. Bizdiń eki balamyz bar – ulymyz 1997 jylǵy, al qyzymyz 1999 jylǵy. Uldy dúkenge jiberip, ózi úıde qalǵan. Ulym qaıtyp kelse, áıelim joq eken. Uıaly telefonyn telefon qýattaǵyshqa qoıyp, úıde tastap ketken. Ol jaýapkershiligi bar adam, eskertpeı eshqaıda ketpeıtin, bizge ár qadamyn aıtyp júretin», - dedi kúıeýi Murat Nuǵmanov.

Kúıeýiniń aıtýynsha, dárihanadaǵy baqylaý kamerasynan Annanyń sońyǵ ret qandaı kıimde bolǵany kórinip tur. Prodúserdiń týystary Annany kórip qalǵan jaǵdaıda myna nómirlerge habarlasýdy suraıdy: +7 707 272 0945.