16 shildede Fınlándıanyń Helsınkı qalasynda AQSH jáne Reseı prezıdentteri Donald Tramp pen Vladımır Pýtınniń kezdesýi bastaldy. Tramp pen Pýtındi Fınlándıa prezıdenti Saýlı Nınınıste Prezıdent saraıynda qarsy aldy.

Kezdesý barysynda Tramp Pýtındi álem chempıonatynyń sátti ótýimen quttyqtady. Ári saýda, ıadrolyq qarý, eki el arasyndaǵy qarym-qatynas, halyqaralyq máseleler sóz boldy.

Tramp eki jaqty kelissózderdiń joǵary dárejede ótkenin, dál mundaı nátıje kútpegenin málimdedi.

AQSH memlekettik hatshysy Maık Pompeomen kezdesken Reseı SİM basshysy Sergeı Lavrov ta kelissózderdiń sátti ótkenin aıtty. «Bári men oılaǵannan da keremet boldy», - dedi ol.

Prezıdent saraıyndaǵy jaǵdaıdy BBC bylaı sıpattady: samıttiń basynda eki prezıdenttiń de qabaǵy qatýly boldy. Tipti bir-birine qaraǵan da joq. Uzaq áńgime jáne aýqymdy kelissózderden soń kóńilderi jaılandy. Baspasóz máslıhaty barysynda ekeýiniń de kóńilderi kóterińki boldy. Jýrnalıserdiń suraqtaryna bir-birimen «jarysa» jaýap berdi.

Al amerıkalyq saıasatkerler Pýtınmen kezdesken Trampty jappaı synǵa aldy.

Helsınkıdegi samıtten soń Pýtınmen baspasóz konferensıasyn ótkizgen Tramp arnaýly prokýror Robert Múllerdiń tergeýin Amerıka úshin «qasiret» dep atady.

Amerıkalyq respýblıkashyl senator, qarýly kúshter komıtetiniń múshesi Lındsı Grem ádette Trampty qoldaıtyn. Biraq Tramptyń dúısenbi kúngi málimdemelerin AQSH-tyń «álsizdigi» dep baǵalady.

Grem Twitter paraqshasyna: «Prezıdent Tramp Reseıdi 2016 jyly saılaýǵa aralasqany úshin jaýapqa tartyp, aldaǵy saılaýǵa aralaspaý jaıly qatań eskertý jasaý múmkindigin jiberip aldy. Tramptyń mundaı málimdemesin Reseı álsizdik dep túsinedi. Munyń sheshkeninen góri týdyrǵan máselesi kóp» dep jazdy.

Respýblıkashyl senator Djon Makkeın «Helsınkıdegi baspasóz konferensıasy – Amerıka prezıdentiniń tarıhtaǵy eń masqara bolǵan kezi. Tramptyń ańǵaldyǵynan, ózimshildiginen, shyndyqty burys qabyldaýy men avtorıtarly basshylarǵa syńarjaqtyǵynan kelgen zalaldy baǵalaý qıyn» dedi.