Mońǵolıadaǵy Baıan-Ólgeı aımaǵyn sel basty. Sonyń saldarynan 275 úı men ǵımarat sý astynda qaldy. Bul týraly jergilikti Monsame agenttigi habarlady.
Aımaqtyń arnaıy komısıasy taratqan derekterge sáıkes, birneshe otbasy zardap shekti. Qutqarý jumystaryna 124 adam, 27 tehnıkalyq birlik, 340 ásker men polısıa qyzmetkerleri, elektrıkter jumyldyryldy. Qazirgi ýaqytta 163 adam qaýipsiz aımaqtarǵa kóshirildi. Taǵy 95-i Ólgeı aımaǵyndaǵy mektep jataqhanasyna ornalastyryldy. Derekterge sáıkes, adam shyǵyny tirkelgen joq.
Tótenshe jaǵdaı komıteti qırap qalǵan ǵımarattardyń sanyn shyǵaryp, úısiz qalǵan otbasylarǵa kómek kórsetý jumystaryn bastap ketti.
Meterologıa jáne gıdrologıa ortalyǵynyń habarlaýynsha, 21 shildege deıin jaýyn-shashyndy bolýy yqtımal. Aspan áli bultty.
Aıta keteıik Baıan-Ólgeı aımaǵynda etnıkalyq qazaqtar da ómir súredi.
2016 jyly 10-11 shildede qatty jaýǵan jańbyrdyń saldarynan Baıan-Ólgeıdi selbasyp, 700 adam baspanasyz qalǵan. Úısiz qalǵandardyń arasynda etnıkalyq qazaqtar da boldy. Osyǵan oraı Qazaqstandaǵy belsendi jastar arnaıy qor quryp, qandastarymyzǵa kómek retinde 200 myń dollarǵa jýyq qarajat jibergen edi.
