«Aqkent» turǵyn úı kesheni janynda aǵashtyń túbinen aýyr halde tabylǵan 4 jastaǵy Muhammed Askaroǵly esimdi balany óz ákesi basynan taspen uryp, aǵashtyń túbine tastap ketken, dep habarlaıdy Qamshy.kz aqparat agenttigi Almaty qalalyq İİD baspasóz qyzmetine silteme jasap.
Qylmystyq isti teksergen polıseıler 4 jastaǵy balany kólik qaǵyp ketpegenin anyqtady.
«Jol apatynyń kýágerimin degen qyz Muhammedti kólik qaǵyp ketkenin kórgenin aıtqan. Keıin bul aqparat jalǵan ekeni anyqtaldy. «Kýágerdiń» aıtqandary tergeý jumystarynyń nátıjesimen qabyspaǵan. Beıne baqylaýdan eshqandaı jol apaty bolmaǵany anyqtaldy. Balanyń jaraqaty da jol apatynyń saldarynan emes ekeni belgili boldy.
Tergeý toby basqa da nusqalardy qarastyrdy. Beıne baqylaýdy tekserý barysynda Muhammedtiń ákesi balasyn qolymen jetektep kele jatqany anyq kórindi. Birneshe mınýttan keıin balany adam joq jerge kirgizip, oǵan qatty ashýlanyp basynan taspen urǵan. Oqıǵa orny jiti tekserilip balany urǵan tas tabyldy», - deıdi Almaty qalalyq İİD ókili Saltanat Ázirbek.
Murat Asqaroǵly óz kinásin moıyndady.
«Tań atpastan iship alǵan edim. Ol qatty mazasyzdandy. Men tasty aldym da basynan urdym. Barlyq qazaqstandyqtardan, polısıadan keshirim suraımyn. Men jazany óteýge ázirmin», - deıdi balany ákesi.
Almaty qalalyq İİD málimetinshe, jalǵan kýágerlik bergen qyz da jaýapkershilikke tartylady. Jalǵan kýágerlik etkenderge qylmystyq jaýapkershilik qarastyrylǵan.
