QR Mádenıet jáne sport mınıstrligi tapsyrysy boıynsha Sháken Aımanov atyndaǵy «Qazaqfılm» AQ-nyń «Debút» shyǵarmashylyq birlestigi 2017 jyly túsirgen qysqametrajdy fılmderdiń arnaıy kórsetilimi Almaty qalasyndaǵy «Arman» kınoteatrynda ótti. Sondaı-aq mádenı is-shara barysynda senarıler baıqaýynyń bıylǵy jeńimpazdar tizimi jarıalandy, dep habarlaıdy Qamshy.kz aqparat agenttigi. 

Kórsetilim aıasynda 2017 jyldyń sońynda óndiriske jiberilgen fılmder, olardyń qatarynda: «Asan» (rejıseri Berik Jahanov), «Shyrǵalań» /«Jut» (rejıseri Jandos Espenbetov), «Sońǵy muǵalim» / «Terpımost (rej. Alen Rahmetalıev), «Ózgeris» / «Túbeteıka»  (rej. Arman Baımuratov), «Tyǵylmaq» (rej. Venera Kaıyrjanova) kartınalary kórsetildi.

Kórsetilimnen keıin fılmderdiń rejıserleri,  Sh.Aımanov atyndaǵy «Qazaqfılm» AQ-y «Debút» shyǵarmashylyq-óndiristik birlestiginiń jetekshisi Anar Qashaǵanova men  atalǵan birlestiktiń kórkemdik jetekshisi Dárejan Ómirbaevtyń qatysýymen baspasóz otyrysy ótti.

Baspasóz konferensıasy barysynda birlestiktiń jetekshisi Anar Qashaǵanova bul kórsetilimniń basty maqsaty – jas rejıserlerdiń jumystaryn qoldaý ári yntalandyrý, óskeleń kınematografısterdiń debúttik fılmderine qyzyǵýshylyq arttyrý ekenin aıtty.

- «Debút» shyǵarmashylyq-óndiristik birlestigi jyl saıyn otandyq kınematografty birqatar jańa esimdermen tolyqtyryp otyrady. Bizdiń birlestikte túsirilgen qysqametrajdy fılmder halyqaralyq kınofestıvalderde laıyqty baǵasyn alyp, marapattarǵa qol jetkizip jatyr. Mysaly «Asan» jáne «Tyǵylmaq» fılmderi mamyrdyń 8-i men 19-y aralyǵynda Fransıada ótken Halyqaralyq Kann kınofestıvaliniń Short Film Corner baǵdarlamasy aıasynda kórsetildi. «Tyǵylmaq» fılmi jaqynda ǵana ótken «Eýrazıa» jáne «Ertis sınema» kınofestıvalderinde de baq synady, - dedi Anar Qashaǵanova.

Aıta ketelik, «Qazaqfılm» kınostýdıasy bıyl da senarıler baıqaýyn jarıalaǵan bolatyn. Baıqaýǵa 80-nen astam jumystar túsip, onyń 10-yn irikteý komısıasy tańdap alǵan. Nátıjesinde Sh.Aımanov atyndaǵy «Qazaqfılm» AQ-y «Debút» shyǵarmashylyq-óndiristik birlestigi tómende kórsetilgen on qysqametrajdy  fılmderdiń avtorlarymen óndiris boıynsha kelisim jasasty:

«Statýsy: bos emes» (rej. Mádı Baljanov), «Juldyzdar» (rej. Beksýltan Ánýarov), «Paıdasyz jaratylystar» (rej. Jánibek Murtazın), «Dombyra» (rej. Ramazan Halıolla), «Júl Vern týraly emes» («Sary kóılek», rej. Talǵat Ábishev), «Mýza» (rej. Arman Qaıyrjan), «Qos aǵash» (rej. Rahymjan Qaldygóz), «Tıyn» (rej. Murat Esjan), «Tamyz» (rej.Jandos Kusaıynov) jáne «Tynyshtyq áni» (rej.Baǵlan Kudaıberlıev).

İrikteýden ótken senarılerdiń  anotasıalary:

«Paıdasyz jaratylystar» 

Senarı avtorlary: Jánibek Murtazın, Baýyrjan Moldashbaev.

Rejıseri: Jánibek Murtazın

Jańa fılm túsirýge bel býǵan eki er adam týraly baıandaıdy.

«Juldyzdar»

Senarı avtory: Asqar Abdollaev

Rejıseri: Beksultan Ánýarov

Tún jamylǵanda kishkentaı qyz aǵyp bara jatqan juldyzdarǵa qarap armandaıdy.

«Tamyz»

Senarı avtory jáne rejıseri: Jandos Kusaıynov

Fılm postkeńestik kezeńde oblys qalalarynyń birinde turatyn bala týraly. Ol basyna túsken qıyndyqtardy sheshýge bel býady.

 «Statýsy: bos emes»

Senarı avtory jáne rejıseri: Mádı Baljanov

Súıgen qyzynyń júris-turysyn únemi qadaǵalaıtyn er jigit týraly fılm.

«Dombyra»

Senarı avtory: Ramazan Halıolla, Janat Jaılybaı

Rejıseri: Ramazan Halıolla

Fılmde 8 jastaǵy Ahmet esimdi balanyń ómiri baıandalady. Dombyranyń qulaǵynda oınaıtyn ol Áıgerimniń sulýlyǵyna tamsanyp júrip, aspabyn joǵaltyp alady.

«Qos aǵash»

Senarı avtory: Shyńǵys Mamanov

Rejıseri: Rahymjan Qaldygóz

Jol apatynan zardap shekken otbasy týraly fılm.

 «Júl Vern týraly emes» («Sary kóılek»)

Senarı avtory: Ádil Nurmuhambetov

Rejıseri: Talǵat Ábishev

Anasymen aýylyna oralǵan bala dosyn izdep aýyldy aralaıdy. Biraq bul kezdesý ol oılaǵandaı bola ma?

«Tynyshtyq áni»

Senarı avtory jáne rejıseri: Baǵlan Kudaıberlıev

Qazaq KSR-niń ortalyǵy, 1940 jyl. Eki er adam dalada jalǵyz turǵan qazaq úıge kelip, bastyqtarynyń tapsyrmasyn oryndamaqshy.

«Tıyn»

Senarı avtory jáne rejıseri: Murat Esjan

Qaıtys bolǵan ákesin qaıtaryp almaq bolǵan bes jastaǵy bala týraly oqıǵa.

«Mýza»

Senarı avtory jáne rejıseri: Qaıyrjan Arman

Fılmde ishimdikke salynyp, jumysynan aıyrylǵan Sáken esimdi kompozıtordyń taǵdyry baıandalady. Bir kúni ol súıiktisin kezdestiredi. Alaıda onyń ómiri ózgere me?