Zamanyń túlki bolsa, tazy bolyp shal degenniń kerisi me álde jańa zamannyń siz ben biz bilmeıtin modasy ma belgisiz. Keıingi ýaqytta estir qulaqqa túrpideı tıetin maǵynasyz esimder kóbeıip ketti. Statısıka komıtetiniń málimetine sáıkes elimizde eki Nurprezıdent, tórt Aqorda, on Nurotan jáne on úsh Nurlyjol atty bala bar eken. Mamandar bolsa mundaı úrdis durys emes degen pikirde. Balaǵa at qoıarda aldymen neni bilý kerek? Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.
Alǵashqy keıipkerimizdiń esimi - Festıvál. Astana qalasynyń turǵyny. «Atymdy mektep jasynda qatarlastarym keleke qylyp mazaqtaıtyn kezder boldy. Biraq ýaqyt óte kele úırenisip kettim» - deıdi ol. Bir qyzyǵy, Festıvál dýmandy, merekelerge toly ortany unatady eken. Atyna zaty saı degen teńeýde osyndaıda aıtylsa kerek.
«Kóbinese kóńildi jerlerde júremin. Kóńildi jerlerdi jaqsy kóremin. Jumys istegende tárbıe jumystaryn kóbine ózime alǵym keledi. İs-sharalardy kóp alǵym keledi. Sondaı jumystarmen aınalysqym keledi. Konsert uıymdastyrý. Bolmasa bir balanyń bir ádemi qasıetin kórdim be, ánshi me álde bıshi me ózime tartyp turǵym keledi. Sondaı nárseler maǵan qatty unaıdy» - deıdi qala turǵyny Festıvál Bolatqyzy.
Erekshe esimderdiń toptamasyna elimizde sońǵy jyldary ótken aıtýly sharalar da áser etpeı qoımady. Resmı derekke sáıkes, Qazaqstanda 57 Azıada jáne 86 Samıt ósip keledi. Buǵan halyqaralyq kórmeniń arqasynda Báıbibekspo jáne Nurálemder qosyldy. Fılolog Bolat Saǵynbekuly atalǵan úrdis keńes zamanynan qalǵan bir ádet deıdi. Qyzyl týdyń astynda komsomol bolǵan keı ata-ana balalaryna Sovet, Sez, Partıa tipti Traktor syndy at qoıǵan.
«Báribir bul jerde dástúrdiń zańdylyǵy bar. Qazaqtar osy dástúrdi berik saqtap kele jatyr. Quptaý-quptamaýǵa kelgende bárin birdeı quptaı berýge bolmaıdy. Sebebi, balaǵa at qoıýda oılaný kerek. Onyń ósken ortasy bolady, zaman ózgeredi. Zaman ózgergende arhaızmge aınalǵanda keı esimder kúlkige aınalady degen sıaqty. Osynyń bárin eskerý kerek sıaqty» - deıdi fılologıa ǵylymdarynyń kandıdaty Bolat Saǵynbekuly.
Adamnyń esimi ómirine sózsiz áser etedi. Imamdar buǵan senimdi. Sondyqtan at qoıarda aldymen balanyń bolashaǵyn oılaý kerek degenge saıady.
«Burynǵy kezderde Qasqyrbaı, Túlkibaı, Itbaı degen sıaqty attardy qoıǵan. Qorazbaı dep te ataǵan. Árıne, ol ýaqytta qoıylǵan esimderdi qoıarda kóńilderinde bir jaqsy nıetteri bolsa kerek. Biz olardy aıyptaýdan aýlaqpyz. biraq balaǵa durys at qoıǵanymyz durys bolady. Bir maǵynaly, ıslam talaptaryna keletin attardy qoıǵan durys» - deıdi «Nur Astana» ortalyq meshitiniń naıb ımamy Ádilhan Serikbaı.
Bosanar aldynda tús kóredi
Iá, 8 jastaǵy Báıterektiń esiminiń qoıylýy quddy bir fantasıkaǵa toly oqıǵa ma dersiń. Kózben kórip, óz qulaǵyńmen estimeseń sený qıyn. Biraq, ápkesiniń aıtýynsha Báıterek ómirge kelerde aıan
berilgen.
«Anam jańaǵy túske senedi. Iá shynymen atyn Báıterek dep qoıaıyn deıdi. Solaı túsinde aqsaqal kelip bata beredi. Báıterek aǵashynyń janynda qustar ushyp júredi bıikte. Bıikten jerge qaraıdy anam. Múmkin ol belgi shyǵar, biz solaı oıladyq» - deıdi Báıterektiń ápkesi Altynaı Baqyt.
Jaqsylyqqa yrymdap qoıylsa keri ketpes. Báıterektiń armany asqaq. Messı men Ronaldý syndy bolmasa da top jaryp, teńbil dopty qaqpaǵa dál kózdeıtin fýtbolshy bolamyn deıdi.
«Meniń atym Báıterek. Men segiz jastamyn. Úshinshi synypqa kóshtim. Anam tús kórgen aıan. Meniń armanym fýtbolshy bolý. Men Astanaǵa jankúıermin» - deıdi oqýshy Báıterek Baqyt.
Nurprezıdent, Ekspobaı, Nurotan, Azıada, Samıthan degen balalar erteń-aq er jetip, el qataryna qosylady. Búginde maqtanmen qoıylǵan attyń erteń-aq Sovet, Marks, Partıa sıaqty eskirip, el arasynda kúlkige aınalmasyna eshkim kepildik bermeıdi. Bul mamandardyń pikiri.
