"Qos sábıimizdi óltirgen dárigerler jaýapqa tartylsyn!" Almaty oblysynda bir jylda eki birdeı perzentinen aırylǵan ata-ana kómek suraıdy. Olardyń aıtýynsha, aýdannyń bas dárigeri bastaǵan aq halattylar qursaqtaǵy sap-saý náresteni bosandyrýdyń ornyna óltirip tynǵan. Alaıda, olar óz kinásin moıyndap, keshirim suraýdyń ornyna barlyǵyn náresteniń anasyna japqan kórinedi. Bul týraly Qamshy.kz aqparat agenttigi Eýrazıa birinshi arnasynyń deregine súıenip habarlaıdy.
Saryózek aýylynyń turǵyny Nurjan Mahanov bul kúnde 2 balany qushaǵynda álpeshteýi tıis bolǵan. Alaıda, qos qulynynan bir-aq jylda aırylyp, óz qolymen jer qoınyna tapsyrypty. Sońǵy ret 8 aılyq shaqalaqty 4 kún buryn ǵana úlkeniniń janyna jaıǵastyrǵan eken. Qaıǵydan qan jutqan azamat buǵan aýdandaǵy dárigerlerdiń salǵyrttyǵy sebep boldy, deıdi.
«Birinshi perzentimnen aıryldym, mine. Qyz bala bolatyn, 9 aı tolǵaǵy kep sodan óli týylyp otyr. Birinshi perzentim osy dárigerlerdiń salǵyrttyǵynyń arqasynda. Odan mine, 4 kún boldy ul balamnan aırylyp otyrmyn, aralary 1 jyl 2-aq aı. Alla, eshkimniń basyna bermesin deımin. Osy Kerbulaq aýdany Saryózek kentiniń myna dárigerleriniń kesirinen dep aıtýǵa týra kelip tur. Budan keıingi balalar ólmesinshi» - deıdi Saryózek aýylynyń turǵyny Nurjan Mahanov.
Mahanovtar otbasy tuńǵyshtarynan 2017 jyly aırylǵan eken. 9 aı tolyp, tolǵaǵy qysqan sátte aýdan dárigerleri em-dom jasaýdyń ornyna Taldyqorǵan qalasyna jibergen kórinedi. Alaıda, 90 shaqyrymdaǵy oblys ortalyǵyna jetkenshe shaqalaq kindikke oratylyp, jan tapsyrǵan. Arada 5 aı ótkende jubaıy kezekti ret bala kóterip, dúnıege qyz keledi dep qýanǵan jas otbasy taǵy da qaıǵydan qan jutady.
«23-shilde aıynda óz aıaǵymmen osy Kerbulaq aýdany Saryózek kentindegi bolnısaǵa bardym. Ol
jaqta meni sohranenıege jatqyzdy, otek aıaǵymda, kishigirim otek bolǵan soń jatqyzdy. Odan keıin eki kún men ampesılın ýkolyn aldym, tańerteń, keshke. Odan keıin sreda 25-kúni terapevt Aıdarova kelip, naznachenıe qaldyryp ketti, keshke sefazalın salynady dep» - deıdi Saryózek aýylynyń turǵyny Madına Jaqsylyqbaeva.
Bári de dárigerlerdiń sevazalın antıbıotıgin salǵan sátten bastalǵan. Arada jarty saǵat ótken soń, júkti áıeldiń ishi aýyryp, jatyrynan qan ketedi. İs nasyrǵa shappasyn dep jubaıy ota jasaýǵa kelisim beredi. Alaıda, ony jasaýǵa tıis dárigerler jarty saǵat boıy naýqastyń janyna kelmegen eken. Degenmen, aýdannyń bas dárigeri óz qaramaǵyndaǵylarǵa shań jýytpaı otyr. Sózine sensek, gıppokratqa ant bergen abzal jandar ózine mindettelgen isti adal atqaryp, qoldan kelgenin jasaǵan.
«1 kılo 900 gramdyq bala dúnıege keledi. Bala, jańaǵy eshqandaı tiri degen belgisi joq deıdi. Biraq oǵan reanımasıalyq barlyq sharalar jasalady. Ol jaqta reanımatologymyz bar, pedıatorymyz bar, mıkropedıatorymyz bar. Solar barlyǵy reanımasıalyq em-shara jasaǵannan keıin, ókinishke qaraı, bala tirilmedi» - deıdi Kerbulaq aýdandyq aýrýhanasynyń dırektory Qanat Qaldybaev.
Qansyrap jatqan jubaıyn ota jasaý bólimine dárigerler emes ózi jetkizgen Nurjan Mahanovtyń sózinshe, otadan keıin shaqalaqtyń jylaǵan daýsy estilgen. Sábıdiń tiri týylǵanyn perzenthanadaǵy medbıkeler de rastaǵan kórinedi. Alaıda, bul týraly tis jarmaýdy ótingen, sebebi, jumystarynan aırylyp qalamyz dep qorqyp otyr, deıdi ashynǵan áke.
«Siz ótirik aıtyp otyrsyz, siz qudaıdan qoryqpaıtyn adam ekensiz. Men sizge senýden qaldym. 10
mınýtta keldik keserova dep, ol jarty saǵat operasıonnyıda jatqan. Áıelimniń de esi durys qoı, ol balasynan aırylǵanmen, myna psıhologıadan qýyp ketken joq, ol erteń de aıtyp bere alady. Al, ana sefazalın salǵanyn áıelimniń ózi aıtyp otyr» - deıdi Saryózek aýylynyń turǵyny Nurjan Mahanov.
Qos perzentinen qapyda aırylǵan erli-zaıyptylar men onyń týystary endi sot-medısınalyq saraptamanyń qorytyndysyn kútetin bolady. Alaıda, ondaǵy mamandar shyndyqtyń betin ashyp beredi degenge senbeıtinderin de jasyrmaıdy. Bir belgilisi - qursaqqa bitken kelesi sábıdi jas jubaılar Kerbulaq aýdanyndaǵy perzenthanaǵa bosandyrmaımyz dep bekinip otyr.
