Keshe Astanada «Atameken» QR UKP Tóralqasynyń Farmasevtıka, medısına ónerkásibi men medısınalyq qyzmetter komıteti qyzmetkerlerine «SK-Farmasıa» JSHS aqparattyq júıeleriniń tanystyrylymy ótti, - dep jazady Qamshy.kz aqparat agenttigi atameken.kz portalyynyń deregin negizge alyp.
«SK-Farmasıa» JSHS Basqarma Tóraǵasy Berik Sháriptiń aıtýynsha, «biryńǵaı farmasevtıkalyq aqparattyq júıe» – logıstıkalyq operasıalar jáne qoımalardy basqarýǵa arnalady. Sondaı-aq, ol qazirgi tańda eki aqparattyq júıeniń qoldanysta ekenin basa aıtty.
«Biryńǵaı farmasevtıkalyq aqparattyq júıe sharttyq mindetterdi oryndaýdyń onlaın-monıtorıgin júzege asyrý, dári-dármekterdi saqtaý men tasymaldaýdyń qajetti talaptaryn oryndaıdy. Sonymen qatar, farmasevtıkalyq ónimderdiń saqtaý merzimin oryndaýǵa múmkindik beredi. Ekinshi aqparattyq júıe – «Dári-dármekpen qamtamasyz etýdiń aqparattyq júıesi» QR Densaýlyq saqtaý mınıstrligimen qurylǵan bolatyn», - dedi B. Shárip.
Buǵan qosa, ol atalǵan júıelerdiń múmkindikteri men paıdasyn aıtyp berdi.
«Bul júıeni qoldaný dárigerlerdiń reseptterin jergilikti jerde alyp, júzege asyrýǵa múmkindik beredi. Buǵan qosa, ambýlatorıalyq-emhanalyq jáne dárihanalyq uıymdarmen qamtamasyz etetin medısınalyq uıymdar arasyndaǵy ózara baılanysty jeńildetedi», – dedi «SK-Farmasıa» JSHS Basqarma Tóraǵasy.
Sondaı-aq, ol 2018 jyldyń aıaǵyna deıin basqarýdyń tıimdiligi men jyldamdyǵyn qamtamasyz etetin aqparattyq-saraptamalyq júıeni engizý josparlanǵanyn málimdedi.
Kezdesý barysynda qatysýshylar óńirler jáne medısınalyq mekemeler keskininde dári-dármekterdi reseptiler boıynsha berýdi aıtyp, dárilik zattardy tutyný esebin júrgizý jaıynda óz usynystaryn bildirgen bolatyn.
Aıta keteıik, «Atameken» Ulttyq kásipkerler palatasy densaýlyq saqtaý salasyn sıfrlandyrý, mindetti áleýmettik medısınalyq saqtandyrýdy engizgenge deıin pasıenttiń elektrondy pasportyn engizý máselesin birneshe ret kótergen bolatyn.
Bıyl maýsym aıynda «Atameken» QR Ulttyq kásipkerler palatasy jáne QR Densaýlyq saqtaý mınıstrligi arasynda 6 baǵyt boıynsha Jol karatasyn júzege asyrý týraly Memorandýmǵa qol qoıylǵan bolatyn. Jobalyq is-sharalardyń biri – «Densaýlyq saqtaýda sıfrlandyrýmen qamtamasyz etý» bar, bul joba aıasynda óńirlerdegi medısınalyq mekemelerdiń aqparattyq júıeleriniń jumysymen vızýaldy tanysý jáne naýqastyń elektrondyq tól qujatyn engizý, monıtorıńin júrgizý qarastyrylǵan.
