2018 jyldyń birinshi toqsanynda «Azamattarǵa arnalǵan úkimet» memlekettik korporasısynyń Jambyl oblystyq fılıalynda 900 myń memlekettik qyzmet kórsetilgen. Onyń 450 myńy elektrondyq formatta oryndaldy, - dep habarlaıdy Qamshy.kz aqparat agenttigi QazAqparatqa silteme jasap.
«Azamattarǵa arnalǵan úkimet» memlekettik korporasısynyń Jambyl oblystyq fılıalynyń dırektory Danıar Medetbekovtyń aıtýynsha, Jambyldaǵy fılıal alǵashqy jartyjyldyqtyń ishinde 900 myń memlekettik qyzmetti kórsetip úlgerdi, ondaǵy 450 myń qyzmet elektrondyq formatta oryndaldy. Áleýmettik qamsyzdandyrý boıynsha 35 myń memlekettik qyzmet kórsetildi.
Sondaı-aq, ol óńirdegi memlekettik korporasıa keńselerinde óz-ózine qyzmet kórsetý bólimi jumys isteıtinin aıtty.
«Árbir front-keńselerde «Connection point» ózine-ózi qyzmet kórsetý sektory jumys jasaıdy. Memkorporasıa mamandary túsindirý jumystaryn ótkizip, elektrondyq úkimet portaly arqyly qyzmet alýdyń amaldaryn kórsetedi. Olar jyldyń basynan beri óńirdiń 480 mekemesi men uıymyna baryp, 87 myń adamǵa qyzmet kórsetken. Osyndaı 19 sektor jumys jasaıdy. Jarty jyldyń ishinde jambyldyqtarǵa 330 myń qyzmet kórsetilgen», - dedi D. Medetbekov.
Onyń aıtýynsha, budan bylaı jańa týǵan sábılerdi tirkeý úshin ótinish avtomatty túrde jazylady.
«Azamattarǵa arnalǵan úkimet» «UAT» AQ-men birlesip balanyń dúnıege kelýine qatysty qyzmet kórsetý boıynsha synamaly jobany usyndy. Endi dúnıege kelgen sábılerdi tirkeý úshin ótinish avtomatty túrde túsetin bolady. Barlyq maǵlumattar ártúrli memlekettik organdardyń aqparattyq júıelerinen túsetin bolady. Málimetter jetpeı jatqan jaǵdaıda qyzmet alýshy adamnan SMS-habarlama arqyly suratylady», - dedi ol.
Taǵy da aıta keterligi, jaqynda eGov.kz portalynda «Anyqtamasyz qyzmetter» bólimi óz jumysyna kirisken bolatyn.
«Endi azamattarǵa memlekettik organdarǵa mekenjaı men jyljymaıtyn múlikke quqyǵy jóninde tirkelgen anyqtama ákelýdiń qajeti joq. Memlekettik organdar qajet maǵlumattardy elektrondyq úkimet portaly arqyly suratatyn bolady. Sondaı-aq, mekenjaı boıynsha onlaın-tirkeý tártibi ózgerdi. Endi tirkelý úshin nebári 20 mınýt qajet», - dep túıindedi dırektor.
Aıta keteıik, «Elektrondyq úkimet» – bul memlekettik qyzmet kórsetýlerdi avtomattandyrý jáne ońtaılandyrý, qoǵamdy memlekettik basqarý máselelerine tartýdy arttyrý bolyp tabylady. «Elektrondyq úkimetti» qurý ıdeıasyn QR Prezıdenti N. Á. Nazarbaev 1997 jyly «Qazaqstan-2030» memlekettik baǵdarlamasynda kótergen bolatyn.
