Adamı kapıtal ekonomıkany qozǵaıtyn kúsh. Ol kez kelgen kompanıanyń damýyna áser etip, tabysty arttyrady. Bul týraly «Adamı kapıtaldyń» damýy jónindegi ekspert Vera Solomatına aıtty dep jazady Qamshy.kz aqparat agenttigi «Zerde» Holdıńiniń deregin negizge alyp.
«Kóptegen kompanıalar «adamı kapıtal» tujyrymdamasyn ońtaıly qoldanyp júr. Óıtkeni, qatty damyp, básekege qabiletti bolý úshin «adamı kapıtal» qozǵaýshy kúsh bolyp tabylady. Osyndaı kompanıadaǵy adamdar kásiporynnyń damýy úshin qyzmet etedi. Sáıkesinshe, budan tabys ónimdiligi artady», - dedi V. Solomatına.
Onyń aıtýynsha, adamı kapıtal ekonomıka men bilim salasyn úlken ózgeriske ákeledi. Ol ekonomıkanyń qurylǵysy emes, kerisinshe ekonomıkany qozǵaıtyn kúsh sanalady.
Suhbat barysynda ekspert «Adamı kapıtaldyń» elimizde qalaı júrip jatqandyǵyna toqtalyp ótip, ózindik baǵasyn berdi.
«Men bul elge kelý arqyly, elde jáne shetelde bilim alǵan joǵary bilikti kóp adamdarmen aralastym.Olar óz kezeginde qazirgi zamanǵy jańa tásilderdi jaqsy meńgergen. Osyǵan qarap, men Qazaqstan bul máselede aldyńǵy qatarda kele jatyr dep aıta alamyn», – dep atap ótti sarapshy.
Vera Solomatınanyń pikirinshe, adamı kapıtal memleketti damytatyn draıver dese de bolady. Ol damıtyn bolsa aldyńǵy qatardaǵy elderdiń qatarynan kóriný múmkin bolmaq.
«Adamı kapıtal memleket úshin resýrs qana emes, eldi alǵa qaraı jyljytatyn qozǵaýshy draıver. Nege deseńiz, biz adamı kapıtal arqyly ınvestısıanyń damýyna, bilim sapasynyń artýyna, osy arqyly memlekettiń damyǵan elderdiń qatarynan kórinýine jaǵdaı jasaımyz. Únemi jaqsy jaqqa ózgerý, damýǵa umtylý kez kelgen memleketti alǵa jeteleıdi», - dep túıindedi ol.
Adamı kapıtal - jumysshynyń eńbek etý múmkindigin, eńbek ónimdiligi men sapasyn kóterý maqsatynda adamdarǵa salynatyn kapıtal. Osynyń nátıjesinde qyzmetkerdiń eńbegi jemisti bolyp, jumys sapasy artady. «Adam kapıtaly» termıni alǵash ret Nobel syılyǵynyń ıegerleri, amerıkalyq makroekonomıster Teodor Shýls pen Garrı Bekkerdiń HH ǵasyrdyń 80-jyldaryndaǵy eńbekterinde paıda boldy. T.Shýls nashar damyǵan elderdiń qıyn jaǵdaıyn zertteı kele, kedeı adamdardyń ál-aýqatyn jaqsartý jerge, tehnıka nemese olardyń kúsh-jiger jumsaýyna emes, bárinen de bilimge baılanysty degen qorytyndyǵa keldi. Ol ekonomıkanyń mundaı sapalyq qyryn adam kapıtaly dep atady. G.Bekkerge keletin bolsaq, ol adam kapıtalynyń teorıalyq modelin jasap, osy másele boıynsha «Adam kapıtaly» kitabyn jaryqqa shyǵardy.
