Elimizdegi kompanıalar óz isterin jeńildetip, qoljetimdi etý maqsatynda kóptegen jobalardy júzege asyrýda. Solardyń biri – «Keremet» kompanıasymen jasalǵan joba. Olar memlekettik satyp alý prosesindegi táýekelderdi basqarý júıesin jasady.

«Qazirgi tańda elimizdegi 50 kásiporyn jańashyldyqtarmen jumys isteıdi. Oǵan mysal retinde «Keremet» kompanıasyn aıtýǵa bolady. Olar usynǵan qyzmet áldeqaıda jaqsy. Atalǵan kompanıa memlekettik satyp alý qyzmetindegi táýekelderdi basqarý júıesin jasaǵan bolatyn. Buǵan qosa, 40 baǵdar ázirlenip, búginde bul baǵdarlardy quqyq qorǵaý organdary paıdalanady», – dedi QR Qarjy vıse-mınıstri Rýslan Eńsebaev Astana hub tehnoparkinde bolǵan kezdesýde.

Sondaı-aq, ol Ulybrıtanıadaǵy sıfrlandyrý prosesine toqtalyp, ondaǵy erekshelikterdi atap ótti.

«Men Ulybrıtanıadaǵy jaǵdaıdy aıtqym keledi. Biz bul memleketpen kelisim jasasqanbyz. Ondaǵy memlekettik aqparattyq júıe damyǵan. Bul el memlekettik organdy damytý úshin aldymen transformasıalyq strategıa jasaıdy. Artynsha jobalardy qolǵa alady. Olardaǵy sıfrlyq bastamalar aǵymdaǵy tapsyrmalardyń tóńireginde qarjylandyrylady», – dedi R. Eńsebaev.

Sondaı-aq, ol memlekettik qyzmetterdiń jumysyn jeńildetý úshin birqatar sharalardyń jasalyp jatqanyn basa aıtty.

«Biz qazirgi tańda «Ulttyq aqparattyq tehnologıalar» AQ jáne memlekettik organdarmen málimetterdi jeńildetý isi boıynsha jumystar atqarýdamyz. Strategıa jasaýda memlekettik organdar ózderiniń jobalary men júıelerin eń birinshi kezekke qoıady», – dedi vıse-mınıstr.

Onyń aıtýynsha, Qazaqstanda elektrondyq júıeler belsendi júzege asyp jatyr. Osy rette Qarjy mınıstrligi is júzinde jaqsy nátıjelerge qol jetkizdi. Atap aıtqanda, elektrondy memlekettik satyp alýdy aıtsaq bolady.

«Qarjy mınıstrligimen 25 aqparattyq júıe jasaldy. Sıfrlandyrý boıynsha bizdiń mınıstrlik kóshbasshylardyń biri. Búginde kóptegen jobalar jasalýda. 2020 jyly turǵyndardy jappaı deklarasıalaý prosesi ótedi», – dedi ol.

Vıse-mınıstrdiń sózinshe, elimizdegi ózekti máselelerdiń biri – jerdi tirkeý. Osy rette, Jol kartasy jasalǵan. Aıta ketý kerek, bul prosester keıin mobıldi qosymshalar arqyly júzege asatyn bolady.

Aıta keteıik, búgin Astanadaǵy Astana hub tehnoparkinde elimizdegi 4 mınıstrliktiń vıse-mınıstrleriniń qatysýymen «Digital Arena» forýmy ótken bolatyn. Oǵan QR densaýlyq saqtaý vıse-mınıstri Oljas Ábishev, bilim jáne ǵylym vıse-mınıstri Rústem Bıǵarı, qarjy vıse-mınıstri Rýslan Eńsebaev jáne eńbek jáne halyqty áleýmettik qorǵaý vıse-mınıstri Narıman Muqyshev qatysty. Óz kezeginde olar elimizdegi sıfrlandyrý prosesi men «Sıfrlyq Qazaqstan» memlekettik baǵdarlamasynyń júzege asyrylý jaǵdaıyn aıtty. Sondaı-aq, jas startaperlerdiń tıimdi usynystaryn qabyl alatyndaryn, otandyq IT-mamandaryn qoldaıtyndaryn jetkizdi.