Saǵadıev: 3-6 jastaǵy balalardy balabaqshamen qamtýdy 93%-ǵa jetkizdik
Astanada 2018-2019 oqý jyly qarsańynda baspasóz máslıhatyn ótkizgen QR Bilim jáne ǵylym mınıstri Erlan Saǵadıev mektepke deıingi balalardy balabaqshamen qamtamasyz etý boıynsha atqarylyp jatqan ister týraly aıtty, dep habarlaıdy Qamshy.kz aqparat agenttigi Baq.kz-ke silteme jasaı otyryp.
Onyń aıtýyna qaraǵanda, memlekettik-jekemenshik áriptestik osy deńgeıde eń jaqsy damyǵan.
"Jekemenshik balabaqshalar úlesi 30%-dan asty. Al 3-6 jastaǵy balalardy balabaqshamen qamtýdy 93%-ǵa jetkizdik. «Balapan» baǵdarlamasy arqyly balabaqshalardaǵy jalpy oryn sany halyqtyń suranysynan asty. Biraq bul respýblıka boıynsha. Aımaqtarda dısbalans bar. Ol mıgrasıaǵa baılanysty. İri qalalarda, ásirese Almaty men Astanada balabaqshanyń jetispeýshiligi joǵary deńgeıde" - deıdi mınıstr.
Sonymen qatar, ol balabaqshaǵa tirkelý máselesin elektrondy túrde júrgizýge kóshý kerektigin aıtty.
"Taǵy bir mańyzdy jumys – balabaqshaǵa kezekke turý men joldama berýdi tolyǵymen elektrondy formatqa aýystyrý. Sonda kezek jarıa túrde jáne tez jyljıtyn bolady" - deıdi ol.
Mınıstr 0-shi synyptardyń oqýshylary men ustazdaryn daıarlaý máselesi týraly aıtty.
"Kelesi jyldan bastap 0-shi synyp tárbıeshileri men muǵalimderdi daıyndaýǵa kirisemiz. Latynsha «Álippe» jáne kırılısada «Býkvar» bazalyq oqýlyqtaryn daıyndaý jumysy júrip jatyr. Oqýlyqtar 2020-2021 oqý jylyna daıyn bolady" - deıdi Erlan Saǵadıev.
