«Áıel syry» baǵdarlamasyna qatysqan 20 jastaǵy boıjetken óziniń qıly taǵdyry týraly stýdıada aıtyp berdi. Týǵan-týys, dos-jarannan uıalǵan bolýy kerek óziniń bet-beınesin jasyrýdy kózdepti. Ádette biz mundaıdy baǵdarlamanyń reıtıńisin kóterý úshin qoldan oılastyrylǵan dúnıe dep topshylaımyz. Biraq bul aktrısa emes, ómirdegi bar adamnyń basynan keshken hıkaıasy deýge negiz bar. Sebebi úılenip jatqan jastardyń jartysy ajyrasyp ketetin qazirgi zamanda óz ákesiniń emes, ógeı ákesiniń tárbıesin kóretin balalar kóbeıip barady. Jalpy, balaǵa qol kóterý, zorlyq-zombylyq jasaý faktileri jıi oryn alýda. Júıkesi juqarǵan, jeke ómirde, qyzmette sáttiligi serik bolmaǵan jandar jyndaryn álsizderden alǵysy kelip turatyndaı.
Ózin Aısulý dep tanystyrǵan boıjetken ákeniń tálim-tárbıesin kórmegen qyz. Mahabbatta joly bolmaǵan anasy ajyrasqannan keıin baǵyn synamaqshy bolyp ekinshi ret turmysqa shyǵady. Alaıda bul joly da baǵy ashylmaıdy. Ekinshi kúıeýi áıelin ǵana emes, ógeı qyzyn da taıaqtyń astyna alady. Alaıda bas kóterýge, qarym-qatynasty úzýge batyly jetpeıdi. Nátıjesinde qyzy qazir er-azamattarǵa senim artpaıdy, «kúıeýge shyǵamyn, baqytty bolamyn» dep aq kóılek kıetin toıdy ańsamaıdy. Búkil tragedıa, mine, osynda jatyr. Aısulýdaı búkil ómirin stýdıada aqtarylyp aıtyp berýge qysylatyn qazaq qyzdary qanshama. Aısulý qaıta ógeı ákesinen ońaı qutylǵan sıaqty... Mundaıda otaǵasynan kóńili qalyp, ajyrasýdy eń durys sheshim dep oılaıtyn qazaq áıelderine telejýrnalıst, búgingi kúni trener-motıvator bolyp myńdaǵan áıeldiń ómirin ózgertip júrgen Janar Baısemizovanyń myna sózderin úlgi etkim keledi:
«Qymbatty kelinshekter, erińiz qyz-qyrqynǵa kóz salsa, birinshi aıqaıǵa baspaı, qıyn bolsa da, ustamdylyq tanytyńyz. Oılanyńyz, bul jaǵdaı nelikten bolýda? Taǵdyr sizdi nelikten bul synaqtan ótkizip jatyr? Erińizdi qalaı sýytyp aldyńyz? Onyń aldynda ózińizdi qalaı ustaısyz? Úıde ózińizdi qalaı ustaısyz? Ne kıesiz? Qalaı júresiz? Erińizdiń aldynda ádemi, názik kórinýge tyrysasyz ba? Ózińizdi kútesiz be? Sanyńyzda sellúlıt bar ma? İshińiz birneshe qatparǵa bólinip, deneńizdi maı basyp bara jatqan joq pa? Ekinshi «podborodoktyń» jaǵdaıy qalaı? Shashyńyz she, sýdyrap tur ma? Betińiz she qýaryp tur ma? Ózińizdiń súıikti isińiz bar ma? Ózińizdi jaqsy kóresiz be? Ústińizden qandaı ıis shyǵady? Jupar ıis pe? Kúıeýińizge dámdi taǵamdar jasap, aıaǵyna massajyn jasap, beresiz be? Erińizge «myrzam» dep ıilip turasyz ba? Suraqtar osylaı kete beredi. Siz dana áıelge aınalǵanda, kúıeý ózgege kóz salmaıdy. Damytyńyz ózińizdi. Ajyrasqanmen, sizge jaqsy kúıeýdi eshkim bermeıdi. Ajyraspańyz. Tıisinshe siz ózgergende kúıeýińiz de jalań sezimderge berilmeı, sanasyn iske qosady».
Qysqasy, qurmetti qazaq áıelderi, ajyrasýǵa asyqpańyzdar! Qyzdaryńyzdyń erteńgi kúnin, taǵdyryn tarazyǵa salyńyz!
