Azat Perýashev Sankt-Peterbýrg Orman tehnologıalyq ýnıversıtetiniń rektoryna osy oqý ornynyń túlegi Álıhan Bókeıhannyń memorıaldy taqtasyn ornatý týraly usynysyn joldady dep habarlaıdy  Qamshy.kz aqparat agenttigi «Aq jol» QDP baspasóz qyzmetine silteme jasaı otyryp.

Hatta esimderi revolúsıaǵa deıingi Reseıdiń, KSRO jáne onyń burynǵy respýblıkalarynyń tarıhyna kirgen kóptegen tanymal jáne aty ańyzǵa aınalǵan adamdar atalmysh joǵarǵy oqý ornynyń qabyrǵasynda oqyp, joǵary bilim alǵany jóninde aıtylǵan. Ýnıversıtettiń eń aıtýly túlekteriniń biri –  XX ǵasyrdyń basyndaǵy Reseı men Qazaqstannyń iri qoǵam ári memlekettik qaıratkeri Álıhan Bókeıhan.

Ol I Memlekettik Dýmanyń depýtaty, Ýaqytsha úkimettiń komısary bolǵan.
1917 jyldyń qarasha aıynda Búkilreseılik quryltaı jınalysynda depýtat bolyp saılandy. HH ǵasyrdyń basyndaǵy qazaq ulttyq qozǵalysynyń kóshbasshysy, «Alash» qazaq avtonomıasynyń negizin qalaýshy jáne jetekshisi bolǵandyqtan da ol shyn máninde Qazaqstannyń memlekettiligin qalyptastyrýdaǵy eń kórnekti ári birtýar tulǵa bolyp sanalady.

«Orys jáne qazaq halyqtarynyń dostastyǵyn nyǵaıtýǵa úles qosqan ǵalym jáne memleket qaıratkeri retinde onyń orasan zor eńbegin moıyndap, A.Bókeıhanǵa qurmet bildire otyryp, «Aq jol» fraksıasynyń depýtattary Sizden ýnıversıtettiń bas oqý korpýsynyń ǵımaratyna kelesideı jazbamen memorıaldy taqtany ornatý múmkindigin qarastyrýyńyzdy suraıdy:

«Bul jerde 1890-1894 jyldary I Memlekettik Dýmanyń depýtaty, Qazaqstan boıynsha Ýaqytsha Úkimettiń komısssary, «Alash» Qazaq avtonomıasynyń negizin qalaýshy jáne jetekshisi, kórnekti memlekettik jáne qoǵam qaıratkeri, jýrnalıs, birtýar ǵalym-ensıklopedıst – Álıhan Nurmuhameduly Bókeıhan (Bókeıhanov) bilim alǵan», - dep aıtylǵan Azat Perýashev qol qoıǵan ótinish hatta.