Bul týraly «Nur Otan» partıasy Tóraǵasynyń Birinshi orynbasary dástúrli «Qazaqstannyń úzdik áleýmettik jobalary» baıqaýynyń jeńimpazdaryn marapattaý rásiminde aıtty.

İs-shara barysynda «Nur Otan» partıasy Tóraǵasynyń Birinshi orynbasary Máýlen Áshimbaev halyqtyń áleýmettik máselelerin sheshý – Elbasy anyqtap bergen elimizdegi eń basty basymdyqtardyń biri ekenine nazar aýdardy.

– Osy baǵytta sońǵy jyldarda memlekettik organdar tarapynan aýqymdy jumystar atqarylyp jatyr. Bıyl Elbasy halyqtyń ál-aýqatyn arttyrýǵa arnalǵan óziniń bes áleýmettik bastamasyn jarıalap, aldymyzǵa jańa mindetter qoıdy. Osy rette qoǵamdaǵy áleýmettik máselelerdi sheshý úshin memlekettik organdarmen birge, úkimettik emes uıymdar, qoǵamdyq birlestikter, kásipkerler jáne saıası partıalar da belsendi áreket etse, kózdegen mejege qol jetkizý jeńildeıtini sózsiz, – dedi Máýlen Áshimbaev.

Sonymen qatar ol jeńimpazdar men qatysýshylardy quttyqtap, barlyq joba avtorlary jeńiske laıyq ekenin aıtty. Odan bólek, partıa Tóraǵasynyń Birinshi orynbasary mundaı baıqaýdyń áleýmettik, rýhanı jáne tárbıelik mańyzy zor ekenin tilge tıek etti.

– Bul, birinshiden, áleýmettik salada belsendiligimen tanylǵan qoǵamdyq uıymdar men muqtaj jandarǵa kómek qolyn sozǵan jeke azamattarǵa qoldaý kórsetýge, olardyń eńbekterin elep-eskerýge múmkindik beretin bolsa, ekinshiden, sondaı birlestikterdi kópshilikke úlgi-ónege retinde dáripteýge jol ashady. Qazirgi tańda elimizde ondaı uıymdar men azamattar myńdap sanalady. Olar osyndaı ıgi isterimen qoǵamymyzda qaıyrymdylyq mádenıeti men áleýmettik jaýapkershiliktiń qalyptasýyna úlken úlesterin qosyp keledi. Sol sebepti «Nur Otan» partıasy osy dástúrli baıqaýǵa atsalysyp, onyń jańa deńgeıge kóterilýine óz septigin tıgizip otyr, – degen Máýlen Áshimbaev aldaǵy ýaqytta partıa osy saladaǵy jumystaryn jalǵastyra beretinin jetkizdi.

Bıyl baıqaý alǵash ret «Nur Otan» partıasynyń jáne Eńbek jáne halyqty áleýmettik qorǵaý mınıstrliginiń birlesip uıymdastyrýymen ótkizildi. İs-sharaǵa bul joly elimizdiń ár óńirinen 318 avtor qatysyp, óz jobalaryn usyndy. Nátıjesinde «Zeınetkerlerge tegin túski as» jobasymen qatysqan Rásıma Temirbaeva – 1-oryn, «Arbadaǵy kedergisiz ómir» jobasymen qatysqan Nurbolat Qarabasov pen «El nazy» art-terapıamen damytý ortalyǵy jobasymen qatysqan belgili ánshi Kenjebek Janábilov – 2-oryn jáne «Úmit sáýlesi», «Meıkaton «TOM: Kazakhstan» jobalarymen qatysqan Marjan Mádıeva men Sánıa Arapova 3-oryn aldy. Odan bólek, onlaın-daýys berý nátıjesi boıynsha 5 qatysýshyǵa júlde tapsyryldy jáne taǵy 3 joba avtoryna arnaıy syılyq tapsyryldy.

Saltanatty sharaǵa «Nur Otan» partıasy Tóraǵasynyń Birinshi orynbasarymen birge Eńbek jáne halyqty áleýmettik qorǵaý mınıstri Mádına Ábilqasymova, sondaı-aq basqa da memlekettik organ, bıznes qaýymdastyq, úkimettik emes uıym ókilderi men Parlament depýtattary qatysty.