«Aqtóbe» satylady. Bastapqy quny 100 mln teńge. Oıynshylarynyń aldynda qaryzǵa belshesinen batqan fýtbol klýbyn jergilikti bılik osylaısha tenderge shyǵaryp otyr. «Eger eshkim qyzyǵýshylyq tanytpasa, el chempıonatynyń bes dúrkin jeńimpazy kóz aldymyzda bankrot bolyp, qurdymǵa ketýi ǵajap emes dep myńdaǵan jankúıer alańdaýly. Aqtóbeniń fýtbolyn shatqaıaqtatqan kimder? Eńsesin endi tiktep kele jatqan klýbtyń topjarýyna ne kedergi? Bul týraly Qamshy.kz aqparat agenttigi Eýrazıa birinshi arnasyna silteme jasaı otyryp habarlaıdy.
«Aqtóbeniń» satylatyny týraly resmı aqparat qarjy mınıstrliginiń saıtyna shyqqaly jankúıerlerde maza joq. Onsyz da máselesi kún tártibinen túspeı turǵan klýbty senimgerlik basqarýǵa berse, bolashaǵy ne bolmaq degen saýal san adamnyń kókeıinde tur. Solardyń biri - Bereket Shaımaǵambetov. Jas jigit jankúıerlerdiń «13 sektor» tobynyń beldi múshesi.
«Qojaıynnyń tabylý-tabylmaýyn ýaqyt kórsete jatar. Biraq, meniń oıymsha, oǵan senim az. Eger alǵan jaǵdaıda ol jaqsy bolady. Óıtkeni, bir qaltadan shyǵady da onyń barlyǵy. Suraýy bolady. Jekemenshik bireý satyp alatyn bolsa, ashyqtyq paıda bolady. Búdjetten bólingen aqsha qalaı jumsalyp jatyr, qaıda ketip jatyr degendeı» - deıdi jankúıer Bereket Shaımaǵambetov.
Sheneýnikter jankúıerlerdiń alańdaýyna negiz joq dep sabyrǵa shaqyrǵanymen, klýbqa eshkim qyzyǵýshylyq tanytpasa, bankrot bola ma, bolmaı ma ol týraly naqty eshteńe demedi. Eń bastysy, klýbty senimgerlik basqarýǵa berý týraly usynysqa oblys ákimi Berdibek Saparbaevtyń esh qatysy joq ekenin eskertemiz deýmen boldy.
«Jelide bizde qaptap shyǵyp jatqan oblys ákiminiń tarapynan osyndaı -osyndaı bolý kerek, sol kisiniń sheshimi degen laqap aqparattyń bári durys emes. Bul jerdegi jekeshelendirýdiń bári úkimettiń sheshimimen jasalyp, erejege qosylyp, biz sol úkimettiń tapsyrmasyn oryndaý úshin jasalyp jatqan sharýalar» - deıdi oblystyq qarjy basqarmasynyń basshysy Gúlnaz Sısenova.
Endi talaptarǵa kelsek. Jańa qojaıyn 7 jyldan keıin ǵana klýbty tolyqtaı óz basqarýyna ala alady. Odan bólek tender sharttarynyń biri - jańa qojaıyn Aqtóbe qalasy men aýdandardaǵy balalar fýtbolyn damytýy da qajet. Eń bastysy - senimgerlik basqarý merziminde basqarýshyny taǵaıyndaý men ornynan bosatý Aqtóbe oblysynyń qarjy basqarmasymen aqyldasa iske asýy tıis. Qazirgi tańda qordalanyp qalǵan qaryzyna qarap, klýbqa «quda túsetinder» bolar ma eken degen suraq týyndaıdy. Al klýbtyń eks-dırektory, basy daýǵa qalǵan Dmıtrıı Vasılev bolsa, kez kelgen adamnyń tenderlik baıqaýǵa qatysyp, op-ońaı jeńimpaz atanatynyna kúmánmen qarap otyr.
«Men zańger retinde klýbty senimgerlik basqarýǵa berý kúmándileý dep sanaımyn. Ári zańsyz. Nege? Óıtkeni, Zańǵa sáıkes, jekeshelendirýdiń eki joly bar - saýdalaý, ıá, bolmasa tikeleı satý. 94-baptyń ekinshi tarmaǵynda Memlekettik múlikti satýǵa tikeleı alyp kelmeıtin, biraq onyń keıinnen satylýyn kózdeıtin is-áreketter jekeshelendirýdiń túrleri retinde emes, onyń aldyn ala júrgiziletin satylary retinde qarastyrylady delingen» - deıdi «Aqtóbe» FK-nyń burynǵy dırektory Dmıtrıı Vasılev.
Qazir klýbqa kimder qyzyǵýshylyq tanytyp otyrǵany jumbaq. Eń bastysy, úmitkerler alǵashqy jarna retinde 15 mln teńge tóleýi tıis. Tender qorytyndysy 9-qazanda belgili bolady.
Aqtóbeniń sapynda bolyp, osy alańda dop tepken 5 oıynshyǵa 213 mln teńge jalaqyny artyq tóledik degen qarjy basqarmasy olardyń ústinen sotqa shaǵymdanǵan bolatyn. Alaıda, nege ekeni belgisiz sońǵy sátte talap aryzdy qaıtyp alypty.
«Talap aryzdar qaıtyp alyndy. Sebebi, qazir aıtyp turmyn ǵoı, kelissózder júrgiziledi árbir sportshymen jáne de Qazaqstan fýtbol federasıasymen kelissózder júrgizilip, oń sheshimin tabady» - deıdi oblystyq dene shynyqtyrý jáne sport basqarmasynyń basshysy Meırambek Mahambetov.
Osylaısha, oblys sportyna jaýapty mamandar klýbtyń qaryzy boıynsha máseleni sheship jatyrmyz dep sendirdi. Al 2018 jylǵa birde-bir bereshegi joq eken. Buǵan deıin jınalyp qalǵan qaryzdardyń bári sol kezde zańnamaǵa saı jasalmaǵan áreketterdiń kesiri dep otyr. Al onyń suraýy kimnen bolmaq, ol saýal sol kúıi basy ashyq qaldy.
