Teatr jáne kıno akteri Tursyn Quralıevtiń dúnıeden ozǵanyn habarlaǵan edik. Marqummen qoshtasý rásimi Ǵ.Músirepov atyndaǵy Qazaq memlekettik akademıalyq balalar men jasóspirimder teatrynda 3 qazan kúni, saǵat 10:00-de ótedi.
Akter kóp jyldar boıy talmaı eńbek etken Ǵ.Músirepov atyndaǵy Qazaq memlekettik akademıalyq balalar men jasóspirimder teatry Tursyn Quralıev týraly estelik jarıalady.
Teatrdyń aǵa býyn aktery, aramyzdaǵy ardaq tutar aqsaqalymyz, QR-nyń eńbek sińirgen artısi, «Qurmet» ordeniniń ıegeri – Tursyn QURALIEV aǵamyz búgin, ıaǵnı, 2 qazan kúni 68 jasynda kenetten baqılyq boldy.
1950 jyldyń 6 qańtarynda Jambyl oblysynda dúnıege kelgen Tursyn aǵa alǵash eńbek jolyn 1967 jyly Moskvadaǵy M.S.Shepkın atyndaǵy Óner ýchılıshesine oqýǵa túsýden, ony 1972 jyly oıdaǵydaı támamdaǵan ol Jezqazǵan qalasyna baryp, oblystyq teatrdyń ashylýyna atsalysyp, onda eki-úsh jyldaı eńbek etip, 1976 jyldan bastap balalar men jasóspirimder teatryna kelip, munda 42 jyl boıy úzdiksiz eńbek etipti.
1976 jyldan bastap, osy teatrda úzbeı qyzmet etip kele jatqan artıs osy jyldar ishinde teatr sahnasynda 100-ge tarta rólder somdapty. Akter qaı kezde bolsa da, teatr sahnasyndaǵy óz jetken bıiginen tómendep kórgen emes. Onyń óneri árdaıym damý ústinde teatr kórermenderin qýantyp keldi. Ol shyǵarmashylyǵyn shyńdap, el senimin odan ári aqtaý údesinde sharshamaı-shaldyqpaı kúni búginge deıin eńbek etti. Teatr sahnasyndaǵy artısik ónerimen kórermen qaýymdy tánti etip, bıik shyńdardan kórine bilgen T.Quralıevtyń teatr sahnasyndaǵy atalǵan shyǵarmashylyq eńbekteriniń alar orny erekshe.
Qazaqstan Respýblıkasynyń eńbek sińirgen artısi, «Qurmet» ordeniniń ıegeri, Ýfa qalasynda ótken Halyqaralyq teatrlar festıvaliniń «Atalar dástúrine qurmet» syılyǵynyń laýreaty, teatr jáne kıno aktery – Tursyn Baıtaıulynyń jarqyn beınesi jadymyzda máńgi saqtalady. Imanyńyz salamat bolsyn, jaqsy aǵa!
