Judyryqtaı júregine adam zatqa degen mahabbatyn syıdyrǵan jandardyń sheksiz erligine, batyldyǵyna, batyrlyǵy kýá bolyp jatamyz. Mundaı ómir mysaldary ómirdi baǵalaýǵa, súıispenshilik pen mahabbatqa baýlıdy. Sondyqtan Indonezıada bolǵan tabıǵat apaty kezinde 100 ómirdi saqtap qalý úshin óz ómirin qurban etken azamattyń erligi týraly jazbaqpyz. Indonezıada bolǵan tabıǵat apatynda 100 adamnyń ómirin saqtap qalý úshin óz ómirin qurban etken 21 jastaǵy jigittiń áreketi kópke oı salady. Ol óz ómiri qansha qymbat bolsa da ushaqtaǵy júzden asa ómir baǵalyraq dep túıdi. Aqqan juldyzdaı qysqa ǵumyr keshse de artynda óshpes iz qaldyrdy. Ómiri qyl ústinde bolǵan júzden asa adamǵa jaqyndarymen qaýyshýǵa, oıdaǵy josparyn iske asyrýǵa, armanyna umtylýǵa múmkin berdi. Mundaı erlikke barý úshin adamǵa rýhanı kemeldik, keń júrek pen batyrlyq qajet-aq.
Indonezıa turǵyndary men dúnıejúzindegi áleýmettik jeli qoldanýshylary 21 jastaǵy Antonıýs Gýnavan Agýngtiń jer silkinisi kezinde jasaǵan erligin sóz etip jatyr. Ol jolaýshy laınerin apat aımaǵynan alyp shyǵý úshin óz ómirin qurban etti.
Ótken jumada áýe dıspecheri Sýlavesı aralyndaǵy Palý áýejaıynda jolaýshylar ushaǵyn basqarǵan. Ol tabıǵı apat kezinde ushaq ushyp ketkenshe qulaǵaly turǵan dıspecher bólmesinen ketýden bas tartqan. Ushaq áýege kóterilgende ǵana munaradan sekirýge májbúr bolǵan. Sebebi syrtqa shyǵatyn basqa jol qalmaǵan. Antonıýs Gýnavan Agýng alǵan jaraqattarynyń saldarynan aýrýhanaǵa bara jatqan jolda qaıtys boldy.
«Agýng óz qyzmetin aqtyq demi shyqqanǵa deıin adal atqardy. Ol ushaq áýege kóterilgenshe dıspecher bólmesinen ketpedi», - delingen Indonezıanyń azamattyq avıasıa basqarmasynyń málimdemesinde.
Juma kúni Antonıýs Gýnavan Agýng jer silkinisi bastalǵanda Batik Air áýe kompanıasynyń reısin baqylaǵan. Ol ýaqytta onyń áriptesteri áýedegi qozǵalysty baqylaý qajet bolmaǵandyqtan tórt qabatty munaradan evakýasıalanǵan bolatyn.
Laınerdiń jerden áýege kóterilý sáti jer silkinisiniń bastalýymen tuspa tus kelgen. Sol ýaqytta dıspecher pýnktiniń shatyry qulaǵan. Agýng terezeden sekirdi. Sonyń saldarynan qoly, aıaǵy men qabyrǵasy syndy.
Agýng tikushaqpen arnaıy klınıkaǵa jetkizilmek bolǵan, biraq jolda kóz jumdy.
Júzdegen adam ómirin saqtap qalý úshin jasaǵan erligi úshin Agýngtiń qyzmeti kóterildi. Áriptesteri Antonıýs Gýnavana Agýngtiń denesin jerleýge apara jatqan fotolaryn jarıalady.
#RIPAgung pic.twitter.com/hLLaLRDCCC
— AirNav Indonesia (@AirNav_Official) 29 sentábrá 2018 g.
Áleýmettik jeli qoldanýshylary jas jigittiń áreketin qyzý talqylap jatyr. Oǵan qaharman ataǵyn berý kerek dep esepteıdi.
«Erlik jasadyń. Kókte qalyqta, Agýng» dep jazdy jeli qoldanýshylarynyń biri.
Indonezıada magnıtýdasy 7,5 jer silkinisi bolǵan. Artynsha sýnamı jerdi shaıyp ketken. Sonyń saldarynan 832 adam kóz jumdy. Mert bolǵandardyń sany ósýi múmkin. Qutqarýshylar tabıǵat apaty bolǵan alys aımaqtarǵa áli barmady.
Mert bolǵandardyń kóbi - Palý aralynda. Júzdegen adam araldaǵy qonaq úı men saýda ortalyqtary úıindisiniń astynda jatqan bolýy múmkin. Qutqarýshylar aralǵa arnaıy tehnıkanyń kelýin kútip otyr.
Kóbi sýnamıdiń saldarynan kóz jumdy. Halyq jaǵajaıda dástúrli festıvál ótkizýge daıyndalyp jatqan.
Indonezıanyń vıse-prezıdenti Iýsýf Kalldyń aıtýynsha, tabıǵı apat qurbandary myńǵa jetýi múmkin. Qyzyl Kresiń málimetine sáıkes, jer silkinisi men sýnamıden 1,6 mıllıonnan astam adam zardap shekti.
Indonezıa úkimeti mert bolǵandardy birge kómýge májbúr bolǵanyn aıtady.
