Kórshiles Reseıde áke týǵan balasyn qatigezdikpen uryp óltirdi. Buryn ata-ana balalaryn álemde bolyp jatqan jamandyq pen qatigez adamdardan qorǵaý úshin baryn salatyn. Qazir kerisinshe balalardy keıbir ata-anadan jyraqta ustaý kerek. Sebebi ata-anasymen ótkizgen ár ýaqyt balanyń ómirine, densaýlyǵyna qaýip tóndiredi. Baýyr eti balasyna qol jumsaý, múgedek etý, aýyr jaraqat salý, psıhologıalyq, emosıonaldyq turǵyda qysym kórsetý beleń alǵan.
Keıde ata-ana balasyn tárbıelik mándegi sabaq bolsyn degen nıetpen qol jumsap sońy qaıǵyly oqıǵaǵa ulasyp jatady. Irkýtskidegi Hadahan aýylynda bolǵan jaǵdaı dál osy senarı boıynsha órbigen.
Alty balanyń ákesi tórt jastaǵy balasy butyna jiberip qoıǵanyn moıyndamaǵany úshin judyryq jumsaǵan. Bala alǵan jaraqaty saldarynan kóp uzamaı kóz jumdy. Sot qatigez ákeni qatań rejımdegi kolonıaǵa 13 jylǵa toǵytýǵa sheshim shyǵardy.
«Men ony ura bastadym. Beldikpen janbasynan 10 ret, 4 ret keýdesinen, odan keıin judyryqpen 7,8 ret, basynan, betinen shapalaqpen urdym», - deıdi 28 jastaǵy er adam.
Qaıǵyly oqıǵa 24 naýryzda keshke Hadahan aýylynda bolǵan. Barlyǵy balanyń anasy men 5 balasynyń kóz aldynda boldy. Olar ashýǵa mingen áke men balanyń arasyna arasha túsýge tyrysqanymen bul áreketinen eshteńe shyqpaǵan. Er adam balasyn tárbıeleýge bóget jasamaýǵa buıryq berip, balany urýyn toqtatpaǵan.
Qatigez áke 4 jastaǵy balasyn jyly sý quıylǵan tegenege otyrǵyzyp, ózi ápkesiniń teledıdaryn jóndeýge ketip qalǵan. Qaıtyp kelgende balasynyń óli denesin kóredi. Tórt jastaǵy qozǵalmastan sol kúıi jan tapsyrǵan.
Psıhologtar balaǵa qol kóterý arqyly ony tárbıeleý qate ekenin talaı márte aıtyp ta, jazyp jatyr. Balany urý arqyly ony túrli psıhologıalyq, fızıkalyq aýrýǵa dýshar etetinin, onyń keleshekte adamdarmen qarym-qatynasyna keri áserin beretinin ǵylymı túrde dáleldese de, ózinen fızıkalyq turǵyda álsiz, jaýap berýge qaýqary men kúshi jetpeıtin balaǵa álimjettik jasaý toqtar emes.
Jaqynda búkil Qazaqstandy shýlatqan osyǵan uqsas jaǵdaı boldy. Balasyn «ólsin» dep aǵashtyń túbine tastap ketken ákeniń áreketi kóptiń shymbaıyna tıdi. Balasynyń basyn taspen jaryp, oǵan medısınalyq kómek kórsetýdiń ornyna shimirikpesten jumystarymen kete bergen.
Balany meıirim, mahabbatqa bóleý, oǵan qamqor bolyp, balanyń ómirin, densaýlyǵyn kóziniń qarashyǵyndaı saqtaý ár ata-ananyń basty paryzy. Naǵyz ómirge daıyndap, sapaly bilim men tárbıe berip, aıaǵynan tik turǵyzyp uıasynan ushyrý – ata-ananyń tikeleı mindeti. Alaıda keıbir ata-ana «Ózimniń balam. Ne istesem de ózim bilemin» degenge salynyp, balanyń bolashaǵyna balta shaýyp jatady. Onyń balalyǵyna, balalyq qatelikterine, ómirge endi ǵana táı-táılap aıaq basqan qadamyndaǵy shalynysýyna, tájirıbesizdigin keshire almaı jatady. Osy rette sarapshylardyń, «mahabbatqa bólenip ósken baladan meırimdi, jaqsy adam shyǵady» degeni ata-analar jadynan shyqpasa eken.
