Almatynyń Medeý aýdanyna qarasty Alataý yqshamaýdanyna endi jańa avtobýstar qatynaıdy. Buǵan deıin jolaýshy tasymaldap kelgen qoǵamdyq kólikterge shaǵym kóbeıgen soń, aýdan bıligi jańa shaǵyn avtobýstar bólgen.

12 myńǵa jýyq halyq turatyn Alataý yqshamaýdanynyń turǵyndary endi qalaǵa jaıly ári jańa avtobýspen qatynaıdy. Kópten beri kókeıdegi máselesi sheshilmegen halyqtyń janyna qoǵamdyq kólik jetispeýshiligi qatty batqan. Al buǵan deıin qatynap kelgen №417 avtobýstyń tehnıkalyq jaǵdaıy nashar bolǵandyqtan jolaýshylar tarapynan shaǵym kóbeıip ketken. Turǵyndardyń ótinishin eskergen ákimshilik 9 shaǵyn avtobýsty iske qosty.

«Búgin Medeý aýdany ákimshiligi Jolaýshylar kóligi basqarmasymen birlesip, 417-shi baǵytty №117-shi baǵytqa aýystyryp jatyrmyz. Búgingi tańda tasymaldaýshy kompanıa – «Samat Trans» JSHS memlekettik sýbsıdıa arqyly alǵan aqshamen jańadan 9 avtobýs alyp, tıisti baǵytqa qosyldy», – dedi Almaty qalasy Medeý aýdany ákimi orynbasarynyń mindetin atqarýshy Berik Soltanbaev.

Avtobýstardy jańartýǵa 96 mıllıon teńge jumsalyp, 30 adam jańa jumyspen qamtylǵan. Endi №117 baǵyttaǵy jańa avtobýs Alataý yqshamaýdanynan «Saıahat» avtovokzaly aralyǵynda jolaýshylar tasymaldaıdy. Qozǵalys jıiligi 14-15 mınýtty quraıdy. Al qoǵamdyq kólikterdegi jolaqy quny ádettegideı, «Ońaımen» tólenip, barlyq jeńildikter saqtalady deıdi avtopark basshysy.

«Qalaishilik baǵyt bolǵandyqtan, barlyq jeńildikter saqtalady. 75 jastan asqan zeınetkerler tegin júredi. Stýdentter men oqýshylar úshin jolaqy quny 40 teńge, jalpy jolaýshylar úshin «Ońaı» kartasy boıynsha 80 teńge. Jol qunyn SMS-tólem boıynsha da tóleýge bolady», – dep túsindirdi tasymaldaýshy kompanıa basshysy Orazbek Sabdenov.

Al jańa avtobýstardyń qosylǵanyna eldi meken turǵyndary dán rıza. Endi jaıly avtobýsta eshqandaı qıyndyqtar týyndamaıdy dep senedi. 

«Burynǵy avtobýstar eski, esik-terezesi jaqsy jabylmaıtyn, sý, qar kirip ketetin, edeni tesik bolatyn. Endi ol avtobýstardan qutylyp, mynadaı jańa avtobýstar kelgenine qýanyp jatyrmyz», deıdi jolaýshylar.

Biz sózge tartqan jolaýshylardyń biri: «Men osy jerde 1994 jyldan beri turamyn. Buryn biz «Saıahattan» bılet alyp júretinbiz. Avtobýstar jıi júrmeı qalatyn, basqa da jol mashaqaty kóp edi» dese, endi biri: «Búgingi kún Alataý yqshamaýdanynyń turǵyndary úshin kópten kútken qýanyshty kún boldy. Avtobýs týraly armanymyzdyń oryndalǵany qatty qýantty.Men osy aýdanda 40 jyldan astam ýaqyttan beri turamyn, avtobýs qıyndyǵyn bir adamdaı kórip kele jatyr edim. Endi ol másele de sheshildi», – dep, qýanyshty kóńil kúıimen bólisti.

Jańa avtobýstar erteńnen bastap jolaýshylar tasymaldaı bastaıdy. Aıta keteıik, №117 shaǵyn avtobýs tańǵy 5:45-ten, keshki 20:30-ǵa deıingi ýaqyt aralyǵynda qatynaıdy.