Bıyl Almatynyń 20 mektebinde robototehnıka synyptary ashyldy. Jyl aıaǵyna deıin bilim oshaqtarynyń 30 paıyzynda tyń tehnologıalarmen jabdyqtalǵan kabınetter paıda bolmaq. Al kelesi jyly 100 bilim oshaǵynda oqýshylar qultemir qurastyrýdyń qyr-syryn meńgere alady.
Estý qabileti nashar balalarǵa arnalǵan №1 arnaıy mektep-ınternatynda robototehnıka synyby ótken jyly óz jumysyn bastaǵan. Alaıda, balalardyń jańa salany tolyq meńgerýine qural-jabdyqtar jetkiliksiz bolǵan kórinedi. Dese de, bilim oshaǵynda qultemir qurastyrýdy úırenemin deýshiler úshin úıirmeler jumys istepti. Oǵan 7 jastan 15 jas aralyǵyndaǵy balalar qatysyp júr.
«Robototehnıka balalardyń oı-órisin, zeıinin damytyp, jan-jaqty bolyp ósýine yqpal etedi. Robototehnıkany meńgerý úshin bizge mamandandyrylǵan basqa mektepterden oqýshylar kelip oqyp jatyr. Oqýshylar bir-birimen tanysy, dostasyp ta jatady. Balalar bir-birinen kóp nárse úırenip,bilgenderin bólisip, aldaryna bıik maqsattar qoıyp úırenedi», – deıdi Almaty qalasy №1 estý qabileti nashar balalarǵa arnalǵan arnaıy mektep-ınternatynyń muǵalimi Laýra Montanaeva.
Ustazdar qaýymynyń oıynsha, ınovasıalardy engizý jáne árbir oqýshymen jeke jumys jasaý ádisi bilim sapasyn arttyryp, jastar arasynda jańashyl kózqarasty damytýǵa septigin tıgizedi. Bıyl qalada 20 mektepte robototehnıka synyptary ashylǵan. Sonyń ishinde, atalmysh mektep-ınternat osy tizimge engen alǵashqy bilim oshaǵy.
«Balalar robototehnıkany meńgerýdi jaqynda bastasa da, eki úlken jarysqa qatysty. Qaraǵandyda ótken halyqaralyq saıysta baǵyn synady. Odan keıin Almatyda ótken jarysqa qatysty. Jetkinshekterdiń tyń tehnologıany meńgerýge qulshynysy joǵary», – dedi Almaty qalasy №1 estý qabileti nashar balalarǵa arnalǵan arnaıy mektep-ınternat dırektory Aleksandra Dnısheva.
Bir robototehnıka synybyn qurý úshin memleket búdjetinen 6 mıllıon teńge bólinedi. Jyl sońyna deıin qaladaǵy mektepterdiń 30 paıyzynda tyń tehnologıamen jabdyqtalǵan kabınetter ashylyp, oǵan qajetti qural-jabdyqtar alynbaq. Al kelesi jyly alyp shahardaǵy bilim oshaqtarynyń jartysynda IT-synyptary paıda bolady.
«2014 jyly tuńǵysh ret jarys uıymdastyrǵanda 15 komanda qatysty. Al osy jyly «Halyq Arenada» ótken saıysta 315 komanda 2000 myńnan astam saıysker baǵyn synady. Baıqaýda balalar aqyldy úı jáne jylyjaı syndy erekshe jobalar usyndy», – deıdi Almaty qalasy Bilim berýdegi jańa tehnologıalar ǵylymı-ádistemelik ortalyǵynyń dırektory Andreı Dýpık.
Almatyda tuńǵysh ret robototehnıka boıynsha jarystarǵa qatysý úshin arnaıy komandalar daıyndalyp jatyr. Jasóspirimderdi shetelden kelgen IT salasynyń mamany oqytady. Keıinnen jetkinshekter iriktelip, úzdikteri AQSH-ta ótetin halyqaralyq saıysta el namasyn qorǵaıtyn bolady.
