Almatynyń Botanıkalyq baǵy qaıta jóndeýden ótip, jańa keıipke enetin boldy. Birneshe aı boıy jurtshylyqpen talqylanǵan jobanyń konsepsıasyn búgin qalanyń Qoǵamdyq keńes músheleri maquldady. Soǵan sáıkes, endi qalalyqtardyń súıikti demalys orny erekshe túrlenedi. Baqqa úsh jaqtan kiretin jol salynyp, tynyǵýshylarǵa jaıly jaǵdaı jasalady. Jasyl jelekke zıan tıgizbeıtindeı jaryq shamdary ornatylyp, beınebaqylaý kameralary qoıylady.
17 gektardan astam aýmaqty alyp jatqan Botanıkalyq baqtyń bolashaq taǵdyryna alańdaǵan jurtshylyq búgin taǵy bas qosty. Barlyǵy qalanyń kórnekti ornyn kórkeıtýdi qolǵa alatyn kásipkerler jobasyn muqıat tyńdady. Jospar boıynsha baq ishi zamanaýı ádisterdi paıdalanyp, qaıta túlemek. Endi baqqa úsh jaqtan kiretin jol salynyp, onda pavılondar qoıylady. Pavılon ishinde bılet kasalary, sháı ishetin oryn men dárethana ornatylady. Kelýshilerge baq jumysynan habardar etetin aqparattyq taqtaıshalar da qarastyrylmaq.
«Buǵan deıin baqty jańartý máselesi kóp talqylandy. Turǵyndardyń kópshiligi baq jóndeýden ótkende komersıalyq maqsattarǵa berilip, kafe-restorandar salynady dep alańdady. Aǵashtar kesilip, jer telimi jekege ótedi dep syn aıtty. Biraq biz munyń barlyǵyn joqqa shyǵaramyz. Jańa jobany jurtshylyqtyń talap-tilegin eskere otyryp daıyndadyq. Bul jumystar júzege asqanda, baqtyń bútindigi saqtalyp, bir de bir jasyl jelek otalmaıtyn bolady», – dedi B. Ótemuratov qorynyń dırektory Marat Aıtmaǵambetov.
Botanıkalyq baqty jańartýǵa Bolat Ótemuratov qory men «Vernyı kapıtal» kompanıasy ókilderi yqylas bildirip otyr. Olar jóndeý jumystaryna shamamen, 15 mıllıon dollar jumsamaq. Qarastyrylǵan qarjyǵa birshama jumys atqarylady. Tozyǵy jetken joldar jóndelip, aýmaq jaryqtandyrylady. Tipti, beınebaqylaý kameralary qoıylady. Al ábden eskirip, qıraǵan qorshaýlar túgeldeı aýystyrylady. Ásirese, buǵan deıin sýarý jaǵy jetkilikti qamtamasyz etilmegen jasyl jelekti turaqty tirshilik nárimen jabdyqtaý kózdelip otyr. Ol úshin baq ishinde toǵandar kóbeıtilmek.
«Botanıkalyq baqtyń shyǵys jaǵynda Tereńqulaq ózeni aǵady. Sol ózendi baqqa qaraı buryp, sý toǵandaryn jasaımyz. Ol toǵandardan baqtyń búkil aýmaǵy sýarylatyn bolady. Jalpy, qazir baqta sýarý júıesi jetkilikti qamtamasyz etilmegen. Injenerlik jeliler de tozǵan. Sondyqtan eń bastysy, baqty turaqty sýmen jabdyqtaýdy kózdep otyrmyz», – dedi «Vernyı kapıtal» kompanıalar tobynyń bas dırektory Erlan Ospanov.
Baq ishindegi burynǵy toǵandar da jóndeý kórip, aryq júıeleri jańartylady. Sýburqaqtar kóbeıtilip, jasyl jelek sany da arta túsedi. Al ár aǵashqa QR-kod ornatý kózdelip otyr. Turǵyndar uıaly telefony arqyly sol QR-kodtan ósimdik týraly bar maǵlumat alady.
«Botanıkalyq baq respýblıkalyq mańyzy bar, erekshe qorǵalatyn tabıǵı aýmaq. Osyǵan oraı, jergilikti ýákiletti organ qala qazynasynan baqty ary qaraı kútip-baptaýǵa qarjy bólýin toqtatpaıdy», – dedi Almaty qalasy ákiminiń orynbasary Sultanbek Mákejanov.
Qala turǵyndarynyń súıikti demalys ornyn jańasha túletetin jobany jergilikti mamandardan ózge, Polsha men Portýgalıanyń landshaftyq sáýletshileri ázirlegen. Eskızdik jobalarǵa turǵyndardyń talap-tilekteri qosylǵan. Tyń jobany búgin qalanyń Qoǵamdyq keńes músheleri túgeldeı maquldap, baqty jańartýǵa biraýyzdan ruqsat etti. Endi qor músheleri iske kirisip, 1,5-2 jylda Botanıkalyq baqty adam tanymastaı ózgertetin bolady.
