3 jyl qatarynan ótip kele jatqan «Bala daýysy» festıvaline qatysýǵa bıyl 3 myńnan asa jetkinshek nıet bildirgen. Óıtkeni, ótinimder jeńildetilgen jańa formatta qabyldanypty.

Baıqaýǵa irikteý mamyrda bastalyp, odan kelesi kezeńge tek 80 bala ótken. Al qazylar alqasy fınalǵa 8 ben 12 jas aralyǵyndaǵy 19 oryndaýshyny tańdap alǵan. Elimizdiń 16 oblysynan jınalǵan daryndar qazir Almatydaǵy «Bóbek» oqý ortalyǵynda turyp jatyr. Olar 2 apta boıy bilikti mamandardardan bı, án jáne akterlik sheberlik boıynsha dáris alady. Búgin olardyń aldynda elimizdiń betke ustar óner juldyzdary sheberlik sabaǵyn ótkizip, aqyl-keńesterin aıtty.

«Bıylǵy saıystyń ereksheligi – balalar kóp keldi. Osymen 3-shi maýsym ótip jatqan saıysqa 11 myńnan astam bala qatysty. Bıyl baıqaýǵa balalardyń kóp qatysýyna irikteýdi ınternet arqyly ótkizýimiz sebep boldy. Biz tek balalar arasynda baıqaý uıymdastyryp qana qoımaı, elimizdiń túkpir-túkpirindegi daryndy, talantty balalardy taýyp, olardy baptap, bolashaq jarqyn juldyzdarǵa aınaldyrsaq deımiz», – dedi «Bala daýysy» balalar án baıqaýynyń úılestirýshisi Ádilbek Bolat.

«Bul baıqaýdan kóp nárse úırenip jatyrmyn. Mysaly, horegrafıa, vokal qyrlaryn meńgerip, basqa da oıyndar oınaımyz. Osyndaı juldyzdy balalar ortasyna kelgenime, fınaldan ótkenime óte qýanyshtymyn!», – deıdi «Bala daýysy» balalar án baıqaýyna qatysýshy Ańsar Júsip.

Aıta ketý kerek, ulttyq án baıqaýynda tek qazaq avtorlarynyń shyǵarmalary oryndalady. Sonyń nátıjesinde, balalardyń án qorjyny 50 shaqty jańa týyndymen tolyqqan. Al jeńimpaz daýys berý arqyly jáne qazylar alqasynyń baǵasy boıynsha anyqtalady. Eń myqty dep tanylǵan ónerpaz Parıjdegi Dısneılendke joldama alady.