Nur Qanatuly degen atpen feısbýkte tirkelgen azamat ózin bloger, qazaqstandyq kásipkerler men qarapaıym azamattardyń quqyǵy men qyzyǵýshylyǵyn qorǵaıtyn qoǵam belsendisi, jemqorlyqqa jany qas adam retinde sıpattaıdy. Ol óziniń feısbýk paraqshasynda kúni keshe ortaǵa bir usynys tastady. Nur Qanatulynyń aıtýynsha, Grýzıanyń burynǵy prezıdenti Mıhaıl Saakashvılıdi Qazaqstanǵa shaqyryp, Úkimetti basqarýǵa múmkindik bersek, nur ústine nur bolady. Feısbýkte jarıalanǵan jazbanyń aına-qatesiz oqyrman nazaryna usynamyz:
«Jaqynda ǵana óz joldaýyn jarıalaǵan Elbasymyz erinshek, enjar, óz mindetin oryndamaıtyn shendilerdi qýyp, olardyń ornyna sheteldik kásibı mamandardy shaqyramyn dep bizdikilerdi qorqytty. Meniń de Elbasyǵa aıtar naqty usynysym bar. Mıhaıl Saakashvılıdi 5 jylǵa elimizge shaqyraıyq, tipti búkil komandasymen kelse qarsy emespiz. Elbasynyń qoldaýymen Saakashvılı bir-eki jylda el ishinde tártip ornatatynyna senimdimin. Naqty atqarǵan isteri úshin oǵan búdjetten qomaqty qarjy berilse de quba-qup. Bastysy - nátıje. Bizdiń Úkimetti nemese eń quryǵanda bir mańyzdy ortalyqtyń tizginin qolyna alǵanyn qalaıtyn edim. Al siz qalaı oılaısyz?»,-dep jazady Nur Qanatuly.
Qoǵam belsendi Nur Qanatuly bul usynys arqyly óziniń qazaqqa qanshalyqty jany ashıtynyn kórsetkisi keldi me álde bul «laık» jınap, tanymaldylyqqa ıe bolý áreketi me, bilmedik. Saakashvılı Ýkraınaǵa barǵanda dym bitirmegenin bilemiz. İritki salyp, masqarasy shyǵyp, elden qýyldy. Bizdiń bılik Mıhaılge oń qabaq tanytyp, elge shaqyryp, qolyna qamshy ustatqanymen Saakashvılı bir nárse tyndyratynyna kúmánimiz bar.
