QR prezıdenti Nursultan Nazarbaevtyń 17 qazandaǵy Fınlándıaǵa sapary barysynda jýrnalısermen kezdesip, suraqtarǵa jaýap berdi. Brıfıń barysynda jýrnalıs Elbasyna 2020 jyly ótetin saılaýǵa qatysatyny-qatyspaıtyny jaıly suraq qoıǵan edi. Nazarbaev búı dedi:
«Sońǵy jyldary bul maǵan jıi qoıylatyn suraq. Eger men 2020 jyly ketetin bolsam, bizdiń balalarymyzdyń jarqyn bolashaǵyn kim qamtamasyz etedi? Al shyn mánisinde, meniń osy laýazymda uzaq otyrǵanymdy oılap turǵandaryńyz anyq. Negizinen, ár bes jyl saıyn ótetin saılaýda halyq meni tańdap keldi. 2020 jyldyń jeltoqsanynda mandatymnyń merzimi aıaqtalady. Ári men búgingi Qazaqstandy qurýshy, táýelsiz memlekettiń alǵashqy prezıdenti retinde maǵan óz úmitkerligimdi usyna alatyn konstıtýsıalyq quqyq berilgen. Bul birneshe faktorǵa baılanysty. Ádette mundaı sheshimdi saılaýǵa jaqyn qabyldaıdy. Sondyqtan kelesi jyly sheshim qabyldaýym múmkin. Nemese 2020 jyly», - dep jaýap qatty Memleket basshysy.
Aıta keteıik, buǵan deıin Qasym-Jomart Toqaev Bı-bı-sıdegi Hardtalk baǵdarlamasyna bergen suhbatynda Nazarbaev 2020 jyly ótýi tıis kezekti prezıdent saılaýyna túspeıdi dep esepteıtinin aıtty:
— Ashyǵyn aıtaıyn, men prezıdent Nazarbaev 2020 jylǵy prezıdent saılaýyna qatysatynyna senbeımin. Óıtkeni ol aqyldy adam, óte parasatty. 2020 jyly bizde prezıdent saılaýy Nazarbaevtan basqa kandıdattarmen ótedi dep oılaımyn", — dedi Toqaev.
Al Aqparat jáne komýnıkasıa mınıstri Dáýren Abaev Toqaevtyń sózin quptaı qoımady. Abaev kerisinshe Nazarbaevtyń saılaýǵa qaıta túsýin jaqsyǵa jorydy:
— Qasym-Jomart Kemeluly aıtqandaı, 2020 jylǵa deıin áli biraz ýaqyt bar. Sheshimdi Memleket basshysynyń ózi qabyldaıdy. Biz buǵan 2020 jyly sol kezdegi jaǵdaımen qaraýymyz kerek. Kóp jyl prezıdent qyzmetin atqarǵan adam, sonymen qatar Elbasynyń saıasat pen ekonomıkadaǵy, halyqaralyq isterdegi zor tájirıbesi men halyqaralyq bedelin eskere kele, Qazaqstan Elbasynyń 2020 jylǵy prezıdent saılaýyna qatysqanynan tek utady dep sanaımyn, - dedi Dáýren Abaev.
Senat spıkeriniń pikirine qatysty elimizdiń syrtqy ister mınıstri de únsiz qalmady. Qaırat Ábdirahmanovtyń aıtýynsha, suhbat asa kúrdeli bolǵanymen Qasym-Jomart Toqaev Qazaqstannyń da, Elbasynyń da saıası biliktiligin kórsete alǵan:
- Qasym-Jomart Toqaevtyń Qazaqstannyń damý jolyndaǵy Nursultan Nazarbaevtyń rólin aıqan kórsetken. Elbasy quryp ketken saıası model berik. Biz «Astana» halyqaralyq qarjy ortalyǵyn qostyq, álim boıynsha ınvestısıalar men jańa tehnologıalardy ózimizge tartyp kelemiz. Senat spıkeriniń suhbatynda munyń ashyq ári júıeli túrde qamtylǵan, - degen edi mınıstr óz sózinde.
♦Qazaqstan Elbasynyń 2020 jylǵy saılaýǵa qatysqanynan tek utady — Abaev
♦QR SİM basshysy Qasym-Jomart Toqaevtyń aıtqanyna qatysty pikir bildirdi
