QR Aqparat jáne komýnıkasıalar mınıstri Dáýren Abaev forýmnyń ashylýynda sóz sóıledi. «Forýmǵa 2500 myńnan astam qatysýshy kelip otyr. Sondaı-aq, álemniń aldyńǵy qatarly kompanıalary men uıymdarynyń 200 jetekshisi, myńdaǵan ınvestor men túrli startap joba avtory bar. Osylaısha alǵa qoıǵan maqsatymyzdyń júzege asýyna dańǵyl jol ashyldy. Óıtkeni jobanyń basty ıdeıasy – tyń ıdeıalardan qýat alyp ózara tájirıbe almasý, Azıa men Eýropa tehnologıalyq ortalyqtarynyń arasynda altyn kópir bolý», - dep atap ótti mınıstr forým ashylýynda.

Abaev Qazaqstanda júzege asyrylyp otyrǵan ınovasıalyq tehnologıalar týraly aıtty. «Elimizde ózderińiz kórip otyrǵandaı búgin ınovasıalyq júıeler iske qosylýda. Erteń Prezıdent halyqaralyq Astana tehnoparkin ashylýyn málimdeıdi jáne bul qazirgi zamandaǵy Qazaqstannyń tehnologıalyq damýyndaǵy jańa kúnge aınalmaq. Biz Uly Jibek jolynyń muragerleri retinde Azıa men Eýropa arasynda sıfrlyq kópir bolǵymyz keledi. Qatysqandaryńyz úshin taǵy da alǵysymdy aıtamyn. Tabysty jumys pen qyzyqty talqylaý tileımin», - dep sózin túıindedi Dáýren Abaev.

Aıta ketsek, forýmǵa halyqaralyq İT-qoǵamdastyq ókilderi, tehnologıa salasyndaǵy belgili sarapshylar, kásiporyn basshylary, tehnologıalyq kásipkerler men ózge de elderdiń memlekettik sektorlary ókilderi, ǵalymdar, kásipqoı sıfrlyq ázirleýshiler, sonymen birge venchýrlyq kapıtalıser men ınvestorlar qatysty.

Búgin Digital Bridge alańynda 50-den asa qazaqstandyq jáne halyqaralyq spıkerler sóz sóıledi, olardyń ishinde: Startup Genome bas dırektory Jan-Fransýa Gote; CEO Hyperloop Transportation Dırk Alborn; Startap akademıasynyń mentory jáne keńesshi, startap taqyryby boıynsha satylymǵa eń kóp shyqqan kitaptyń avtory Bob Dorf; Galaktıka jeke menshik ǵarysh kompanıasynyń negizin qalaýshy jáne ıesi Alıa Prokofeva; Priceline Group qosa negizin qalaýshy Djeff Hoffman; venchýrlyq kapıtaldyń halyqaralyq fırmasy Global Catalyst Partners tóraǵasy jáne teń merdigeri Kamran Elahıan bar.

Forým aıasynda «Sıfrlyq ekonomıka damýynyń jahandyq trendi jóninde dıalogy» atty plenarlyq sesıasy ótedi. Sonymen bige sıfrlandyrý salasyndaǵy eń alǵashqy Digital Bridge Awards júldesi tabystalady.