Qazaqstanda ınjenerlik baǵyt óte jaqsy damyǵan. Bul týraly búgin «Digital Bridge» halyqaralyq ınovasıalyq forýmy aıasynda BAQ ókilderine suhbat bergen «The Startup Owners Manual» teń avtory, kásipker Bob Dorf bildirdi, dep habarlaıdy QazAqparat tilshisi. 

«Qazaqstanǵa alǵash ret kelip otyrsam da, sizderdiń qol jetkizgen jetistikterińizdi kórip tań qaldym. Keshe 60-tan astam startappen tanysqan edim. Qazaqstannyń bul baǵytta jumys isteı bastaýy  shabyttandyrady. Elde ınjenerlik baǵyt óte jaqsy damyǵan eken. Sonyń arqasynda elderińizdiń startaperleri barynsha qarapaıym ári óte tıimdi ádisterdi qoldanady», - dedi ol. Onyń paıymynsha, bul Qazaqstan úshin óte jaqsy. Sebebi ony arqasynda jańa salalardy damytýǵa múmkinshilik  mol. «Olar oǵan mol energıa jumsap, qomaqty qarajat salady. Nátıjesinde onyń jahandyq deńgeıde de, Qazaqstan úshin te paıdasy mol. Jalpy, Qazaqstanǵa kelýdegi basty maqsatym yntymaqtastyqty odan ary damytý úshin baılanys ornatý boldy», - dedi Bob Dorf.

Aıta keteıik, forýmynyń ashylýynda QR Aqparat jáne komýnıkasıalar mınıstri Dáýren Abaev Qazaqstan Azıa men Eýropa tehnologıalyq ortalyqtarynyń arasynda altyn kópirge aınalatyndyǵyn aıtty. Digital Bridge - Qazaqstandaǵy bıylǵy jyly ótip otyrǵan basty ınovasıalyq oqıǵa.  Qatysýshylar forýmnyń dıalogtik alańynda sıfrlandyrý salasyndaǵy sońǵy álemdik trendterdi talqylap, aldyńǵy qatarly tájirıbelermen jáne bıznes-modeldermen bólisedi. Forýmǵa halyqaralyq İT-qoǵamdastyǵynyń negizgi ókilderi, tehnologıa salasyndaǵy tanylǵan sarapshylar, kásiporyn basshylary, tehnologıalyq kásipkerler, sondaı-aq birqatar eldiń memlekettik sektorlarynyń ókilderi, ǵalymdar, sıfrlyq ázirlemeler salasynyń mamandary, venchýrlyq ınvestorlar qatysýda. Forým aıasynda «Sıfrlyq ekonomıka damýynyń jahandyq trendi jóninde dıalogy» atty plenarlyq sesıasy ótedi. Sonymen qatar, sesıa jumysyna QR Premer-Mınıstri Baqytjan Saǵyntaev, Reseı Federasıasynyń sıfrlyq damý, baılanys jáne buqaralyq komýnıkasıalar mınıstri Konstantın Noskov qatysady dep kútilýde.