Oljas Súleımenovke batyryp aqyl aıtý kúsheıe tústi. Talantty ári uzaq ǵumyryn ultynyń ósip- órkendeýine arnaǵan tulǵa qaıǵysyn eshkimniń basyna bermesin. Sol kólik apatyn bárimiz kórdik. Jol erejesi buzyldy. Árıne, kim buzbaı jatyr dermiz. Árkimniń basynda bolǵan jaı. Sol sátte ólim men ómir arasynda otqa oranǵan Eskendirge aınalasyndaǵy jurt júgirip jetip, qol ushyn berýge janushyrdy. Biraq, jol erejesin buzǵan polkovnıktiń qyzy Eskendirge jolamady. Birden telefonyna jarmasty. Onyń telefonnan kimmen uzaq sóıleskeni belgili. Jáne osy oqys jaǵdaıdan qutylýdyń shtrıh sheshimderi aıtylǵan da shyǵar. Al, sol kezde armanǵa toly jas ǵumyr qıyldy.

Adam. Adamgershilik. Qınalǵanǵa qol ushyn ber. Menińshe, másele sonda. Bul – qoǵam qasireti... Zaıyrly qoǵam Batysta, bizde emes degenge sıgnal.

Sotta polkovnıktiń qyzy jol erejesin buzǵanyn moıyndady. Ókinishpen jylap, kesh bolsa da keshirim surady. Qaıǵy shekken jaqta da ýáj az emes. Endeshe biz oǵan nege aralasamyz? 

Qazaqshylyqqa salyp: "Aldyńa kelse, atańnyń qunyn kesh" demekshi, bul jas qyzdy sottatyp, temir tordyń artyna otyrǵyzǵanda nemeresi qaıta kelmeıdi», - dep úkim shyǵaramyz. Tipten motosıkldi qatty júrgizgen marqum Eskendir ózi kináli deýshiler de shyqty.

Biz kimbiz? Zań bárine ortaq bolsyn deımiz de, ejelgi qazaqshylyqtan shyqqymyz kelmeıdi. Aqyl aıtamyz.

Qandaı jaǵdaıda da Zań ústemdigi bolýy tıis. Oljas aǵamyz da sony aıtyp, sotqa barýdan bas tartty. Nemeresi Eskendiri týraly júrek jylaıtyn essesin oqyńyzdar. Túsinersizder uly tulǵanyń jan tebirenisin.

Eger motosıklde Oljas aǵamyzdyń nemeresi bolmaǵanda bul oqıǵa úsh kúnnen soń eki jaqtyń kelisimimen jabylyp qalar edi. Eshkim ol týraly eshteńe bilmes edi. Ondaı jaǵdaı bolǵan, bola beredi de. 

Búgingi zıalymyn deıtin zamandastar eskiniń kóleńkesinde qalyp qoımasa dep oılaımyn. Zańǵa baǵynaıyq. Órkenıettilikke umtylaıyq. Oljas aǵamyzdy mazalamaıyq.

Mahat Sadyq