Elimizdiń ekonomıkalyq múddesin qorǵaý onyń básekege qabilettiligin arttyrý men damytý jolyndaǵy ózekti basymdyqtardyń biri bolyp esepteledi. «Qazaqstan-2050» strategıasynda ekonomıkalyq ósýdiń jańa modelin qalyptastyrý úshin táýelsizdik alǵannan bergi halyqaralyq ekonomıkalyq qatynastardy odan ary jandandyryp, aıasyn keńeıtý syrtqy saıasattaǵy asa mańyzdy baǵyt retinde qalyptasty.
Qazaqstandyq óndiristiń basym salalaryna ınvestısıalardy tartý men otandyq ónimderimizdi eksporttaý máselelerin ekonomıkalyq jáne saýda dıplomatıasyn saýatty júrgizý arqyly ǵana iske asatyny belgili. Bul ásirese, Eýrazıalyq ekonomıkalyq odaq men Shanhaı yntymaqtastyq uıymy sıaqty halyqaralyq qaýymdastyqtarda elimiz ekonomıkalyq yntymaqtastyqty oıdaǵydaı júzege asyryp keledi. EKSPO-2017 kórmesin ótkizý arqyly halyqaralyq bedelimizdi arttyrý da óziniń tıimdiligin berýde.
Búgingi tańda elimizde ınvestısıalardy tartý úshin jetkilikti zań shyǵarýshylyq baza qalyptasqan. Qolaıly ınvestısıalyq jáne iskerlik klımattyń bolýy sheteldik ekspertter men bıznes-áriptester tarapynan áldeqashan moıyndalǵan. Degenmen, bul iste qol jetken kelisimderdiń sapaly oryndalýyn qamtamasyz etý úshin keıbir túzetýler jasalýy kerek.
Osy maqsatta «Qazaqstannyń úshinshi jańǵyrýy: jahandyq básekege qabilettilik» joldaýy aıasynda Syrtqy ister mınıstrligi, Investısıalar men damý mınıstrligi Elbasy tapsyrmasymen qazaqstandyq ónimderdi sheteldik naryqqa shyǵarý úshin sharalardyń birlesken josparyn jasady. Atalǵan jobaǵa osy eki mınıstrlik pen syrtqy ónim shyǵarý ulttyq operatory «Qazaq Eksporttyń» barlyq kúshi jumyldyrylǵan. Sonymen birge elimizdiń syrttaǵy barlyq elshilikteri men ókildikteri osy baǵytta qoldaý kórsetip, atsalysatyn bolady. «Qazaq Eksport» ulttyq kompanıasynyń negizgi mindeti otandyq ónim óndirýshilerdiń taýarlaryn shetke shyǵaryp satýda júıeli de keshendi qoldaý kórsetý bolyp tabylady.
Shet elderdegi Qazaqstannyń barlyq elshilikteri men ókildikteri osy oraıda Úkimet tarapynan belgilengen jumystardy atqaryp, sol jaqtaǵy bıznes-qaýymdastyqtarmen aradaǵy «baılanystyrýshy býyn» qyzmetin abyroımen atqarýda. Olar barlyq memlekettik organdar men jeke kásipkerlerge áleýetti ınvestorlarmen birge jumys isteýde óz qyzmetterin kásibı deńgeıde atqarýda.
Sonymen birge barlyq sheteldik kompanıalar men ınvestorlar úshin Qazaqstandaǵy memlekettik jáne kvazımemlekettik menshikti jekeshelendirý boıynsha da elimizdiń syrttaǵy dıplomatıalyq ókildikteri jumys isteýde. Mysaly, «Samuryq-Qazyna» Ulttyq ál-aýqat qory osy baǵytta Syrtqy ister mınıstrligimen birlesip, aýqymdy jumystar atqarýda. Álemniń iri 10 elindegi dıplomatıalyq ókildikterde arnaıy keńesshiler shtaty da ashylyp, olar tek qana bıznes salasy boıynsha jumylǵan túrde qyzmet etýde.
«Qazaq Invest» jáne «Qazaq Eksport» ulttyq kompanıalarynyń da shet jerlerde ofısterin ashý jospary bar.
Álemdi jaýlaǵan ekonomıkalyq daǵdarys bolǵan kúnniń ózinde tek qana 2005 jyldan beri elimizge 240 mlrd AQSH dollary kóleminde tikeleı ınsvestısıa joǵaryda atalǵan jumystar arqasynda tartyldy. Osylaısha elimizdegi bızneske qolaıly jaǵdaı shetel ınvestorlaryn odan ary bizge jaqyndastyra tústi. Oǵan dálel retinde DoingBusiness reıtıńinde Qazaqstan 2016 jyly 41 orynda bolsa, 2017 jyly 35 - orynǵa kóterilgen. Bul 190 memleket arasyndaǵy jaqsy kórsetkish dep aıtýǵa bolady.
Agrobıznesti damytý maqsatynda Qazaqstannyń Syrtqy ister mınıstrligi Aýyl sharýashylyǵy mınıstrligimen birlesip 2017-2020 jyldarǵa arnalǵan jospardy bekitip, agroónerkásip salasy boıynsha yntymaqtastyq pen ınvestısıalyq qyzmetterdi kúsheıtý baǵyttary da anyqtalǵan.
Joǵaryda atalǵan jospardy júzege asyrý aıasynda aýyl sharýashylyǵy kompanıalary men mamandaryn shet eldegi túrli sharalarǵa qatystyryp, ári tájirıbe almasyp turýy úshin dıplomatıalyq korpýs barlyq jaǵdaılardy jasaý úshin qyzmet etýde.
Serikqazy Kókenaı
