Nur saýlaǵan gaýhar tastaı qarashyqtan nur emes,
mólt-mólt etip jas tamsa;
eljiregen et júregiń qan jylap, 
qan ketkesin qatqan qara tas bolsa;
bodandyq pen kemdiktiń, 
bostandyq pen teńdiktiń,
myna zamandaǵy maǵynasy bos bolsa;
qý tirlikti súrgeniń – 
toǵyz aýyz tobasyz sózben
nemese toǵyz túıege júk bolar baılyqpen
nemese toǵyz gram qorǵasynmen ǵana rastalsa – 
sonda aqıqatty qaıdan tabamyz?

Ózimizge bar baqytty ózimizge qımasaq;
ýaqyt pen keńistikti noqtalaǵan kóńilin, 
mezgilden de jańylyp, shekti qoıyp,
qara jer men kók aspannyń aıasyna syımasa;
bireýdiń nadandyǵy men toqshylyǵy da,
bireýdiń jamandyǵy men joqshylyǵy da,
aınalyp kelgende, qara halyqty ǵana qınasa;
azýy bar – azýlymyn eken dep aıylyn jımasa;
quryǵy uzyn – quryqtymyn eken dep qulqynyn tyımasa –
sonda táýbeni qaıdan tabamyz?

Din, dil deımiz, til deımiz...
Dindaryń kim, din qaıda?
Dilmaryń kim, dil qaıda?
Tilemsek kim, til qaıda?
Shaǵystyryp otty sýǵa, kókti jerge, kúndi aıǵa;
Bar ilimdi oıbotqa qyp,
joq ilimdi oılap taýyp, áıteýir,
qoıyrtpaqtap keltiremiz yńǵaıǵa.
Kóz de, sóz de, kókirek te Allaǵa emes,
adamǵa qul mundaıda – 
Sonda ımandy qaıdan tabamyz?

Birlik qaıda? 
Bar ma birlik, oı baqsaq?
Batys, shyǵys, ońtústik bop
jeke-jeke aımaq sap;
rýyńmen dep ý ishkizip,
óziń zámzám sý iship;
shatyrdaǵy oryn úshin shaıtanmen de týysyp, 
odan qalsa atasyzdyń ıtimen ań qýysyp,
ıtaıaǵyn jýysyp, 
al jaı kúni óz jurtyńa kisimsiný qaı maqsat?

Tirlik qaıda?
Shyndyq – jalǵan;
táýbe – qalǵan;
birlik – arman;
ıman – joq.
Japa shekken aǵaıynnyń atqanyna uıyǵan bop,
reti kelse solarmen qyshqyldatyp sharap jutyp,
ystyq-ystyq shaı iship; 
jel jaqqa bir oıysyp;
«saıasat» dep, «mádenıet» dep qabyrǵamyz qaıysyp,
óp-ótirik otyramyz maıysyp.

Bylaı shyǵa qysyr sóz ben qur uıqydan bas almaı;
Janǵa paıda ákelmeıtin shúkirlikten asa almaı;
bireý esik ashardaı; 
bireý qyzmet jasardaı;
bireý jambas asardaı;
bireý quman tosardaı,
kergımiz kep, sorǵa bitken qısyq aǵash sekildi.
Men be jalǵyz kekildi?
Sen be jalǵyz kekildi?

Ekeýmizde ne aıyrma?
Eki qol men eki aıaqqa – jalǵyz bas;
tánimizdi oıyn, janymyzdy oı sorǵan;
ózimiz de bilmeımiz – qaısy murat, qaısy arman.
Tek qıal bar – qumaı shalǵyzbas,
kúdik bar – túlki alǵyzbas.
Sosyn... sosyn ózgermeıtin
túsinik bar – qatqan terideı,
barlyǵyna bir tártip bar – qulyn baılar jelideı.
Áı, túbi bar ǵoı – 
emeksitken sol qıal
qumshekerdeı erimeı,
elegzitken sol kúdikten jerimeı, 
túsinikter kúıremeı, 
kóni tartqan terideı – 
tipti de oppa tappaspyz!....

Talǵat Eshenuly