Balabaqsha tárbıeshisi uıyqtaǵysy kelmegen balanyń erkeligin kótere almaı, qıanat jasaǵan vıdeosyn búkil Qazaqstan bolyp kórgen edik. Áleýmettik jeliniń aýqymdylyǵynyń arqasynda tárbıeshiniń aty-jóni de, opyq jegen balanyń ata-anasy da tez-aq tabyldy. Úmit Pirmahanova esimdi baqsha tárbıeshisiniń uıyqtatý ádis-tásiline qatysty QR zańnamasyna sáıkes 140 baptyń 2 tarmaǵy boıynsha is qozǵalǵan bolatyn. Esterińizge sala keteıik, 140 bap «Kámeletke tolmaǵan adamdy tárbıeleý jónindegi mindetterdi oryndamaý» máselesine arnalady.
♦Balany tunshyqtyrǵan bezbúırek áıel 3 jyldan keıin qaıtadan tárbıeshi bola alady
«Balaǵa kúsh jumsaǵan áıel zańǵa sáıkes qalaı jazalanady?» degen suraǵymyzǵa baspasóz hatshysy eki jarym aı buryn bylaı dep qysqa-nusqa jaýap qaıyrǵan bolatyn: «Zańǵa sáıkes mynandaı jaza túrleri taǵaıyndalýy múmkin: 1) 300 aılyq kórsetkishi kólemindegi aıyppul; 2)240 saǵattyq qoǵamdyq jumys; 3)72 táýlikke temir torǵa qamalý. Eń qyzyǵy, 3 jyldan keıin «tárbıeshi» qaıtadan tárbıeshi bolyp qyzmetke kirisýge tolyqqandy quqyly eken.
Mine, kópten kútken sot prosesi Temirtaýda bastalyp ta ketti. Alaıda jábir kórgen qyzdyń et jaqyndary balanyń atalmysh jaǵdaıdan keıin tomaǵa-tuıyqtalyp, nashar uıyqtap júrgenin, eresekterden qatty qorqyp qalǵanyn, tipti ashý-yzaǵa jaqyn bolyp ketkenin habarlady. Sotqa vıdeodaǵy kórinis az bolyp otyr. Tárbıeshini 72 saǵatqa emes, tolyqqandy jaza tartqyzý úshin qarshadaı qyz bir aıǵa jalǵyz ózi psıhdıspanserge jatyp, tekserilip shyǵýy tıis eken. Sonda ǵana olar balaǵa keltirilgen qıan-keski árekettiń saldaryn dáleldeı alady eken. Sondyqtan da shaǵymdanýshy ata-ana tárbıeshige qatysty isti basqa baǵytqa buryp, áıeldi qatań jazalaýyn talap etip otyr. Sebebi istiń kvalıfıkasıasyn ózgertpese, tárbıeshi 75 kúnnen keıin bostandyqqa shyǵady.
Balany tunshyqtarǵan tárbıeshi Úmit Pirmahanova bolsa, ózine taǵylǵan barlyq aıyptarmen kelispeıtindigin jetkizdi. Onyń oıynsha, ol tek mazasyz balany uıyqtatpaqshy bolǵan. Balaǵa eshqandaı zıan keltirmegen.
Sot-medısınalyq saraptama nátıjesi áli belgisiz. Onyń qorytyndysy ústimizdegi jyldyń 14 qarashasynda belgili bolady.
