Birneshe reseılik telearna Grýzıada Tbılısıdiń shet aımaǵynda qupıa zerthana bar ekenin habarlady. Onda adamdarǵa qupıa túrde qaýipti tájirıbe júrgizetini aıtylady.

«Zańsyz tájirıbe» týraly alǵashqylardyń biri bolyp Grýzıanyń burynǵy memlekettik qaýipsizdik mınıstri Igor Gıorgadze aıtqan edi. Ol Grýzıa turǵyndaryna AQSH-tan ákelingen tekserilmegen preparattardy salyp, sonyń saldarynan adamdar kóz jumǵanyn «dáleldeıtin» qujattardy jarıalady-mys.

Odan keıin Reseı bıligi ákimshilik ǵımaratyndaǵy zerthananyń eki qabatynda amerıkalyq áskerıler júretinin aıtty.

Bul aqparattardyń ras, ótirik ekenin anyqtaý úshin Bı-bı—sı korespondenti Stıv Rozenberg Tbılısıge baryp «ólim zerthanasyn» óz kózimen kórdi.

Georgıı Hatelıshvılı qujattardy jasaǵan adamdardyń biri. Ol  2015 jyly Grýzıanyń Densaýlyq saqtaý mınıstrliginde jumys istedi. Dúnıe júzine tanylǵan baǵdarlamanyń basty maqsaty — Grýzıadaǵy S gepatıtin joıý. Baǵdarlama aıasynda qoldanylǵan amerıkalyq preparattar tájirıbeden ótkizilip, qoldanýǵa ruqsat berilgen.

«Gıorgadze myrza nelikten "adamdarǵa tájirıbe jasalyp jatyr" dep aqparat taratqany túsiniksiz. Sebebi 36 000 adam jazylyp shyqty. Onyń tek 200-i ǵana kóz jumdy jáne janama áserler de az boldy», - deıdi Georgıı Hatelıshvılı.

Tbılısı mańyndaǵy zerthanany Grýzıa bıligi basqarady. Biraq ǵımaratty AQSH-tyń qorǵanys mınıstrligi saldy.

Máskeý ortalyqtyń eki qabaty Amerıkanyń áskerine arnalǵan degen oıda. Bul aqparattyń jalǵan ekenin dáleldeý úshin aýrýdy baqylaý ortalyǵynyń dırektory  Amıran Gamkrelıdze Bı-bı-sı jýrnalısine ǵımaratta ekskýrsıa jasady.

«Múmkin men olardy bir jerge tyǵyp otyrǵan shyǵarmyn? Amerıkalyq áskerıler qaıda ekenin bilesiz be?», - dep kúldi ortalyq dırektory.

Reseı zerthanada ınfeksıa juqtyrǵan masany taratatyn drondardy jasap shyǵaratynyn aıtady.

«Bizdiń ondaı ispen aınalysyp jatqanymyzdyń dáleli qaıda? Olar dáleldi bizge kórsete ala ma? Munda Grýzıa týraly qaıda jazylǵan? (qolyndaǵy qaǵazdy kórsetip)», - deıdi Amıran Gamkrelıdze.

Bı-bı-sı jýrnalısi jan-jaqty zertteý júrgizgennen keıin Reseı taratyp otyrǵan aqparattyń jalǵan ekenine kóz jetkizgen.

Jalǵan jańalyqtardyń basty problemasy – olardyń shyndyqqa uqsaýy. Bir sátke bolsa da toqtap, detaldarǵa mán berseńiz, istiń aq-qarasyn ajyrata alasyz.

Reseı Federasıasynyń Syrtqy ister mınıstrliginiń resmı ókili Marıa Zaharova dálel týraly bylaı degen edi: «Qazir sizderde dálel bolmasa ol múlde joq degen sóz emes».

Tájirıbe týraly alǵashqylardyń biri bolyp habarlaǵan Igor Gıorgadzeniń ózi sózin dáleldeı almaı otyr.

Jýrnalıs: — Klınıkalyq tekserýden ótpegen preparatty Grýzıa turǵyndaryna bergenine dálel bar ma?

Igor Gıorgadze: — Joq, men birdeńeni dáleldep otyrýǵa zaýqym joq. Men máseleni kóterip otyrmyn.

Jýrnalıs: — Bul jalǵan aqparat qoı, ıaǵnı?

Igor Gıorgadze: — Bilmeımin! Bilmeımin!