Qazaqstandyq 25 onlaın-basylymǵa oqyrmandar aýdıtorıasyn taldaýǵa arnalǵan Chartbeat quralyn tegin endirip, otandyq naryqta birinshi bolyp qoldanýǵa múmkindik berilmek dep habarlaıdy Qamshy.kz aqparat agenttigi "Qazaqstan Baspasóz klýbyna" silteme jasaı otyryp.
Baıqaý aıasynda irikteý kezinde respýblıkalyq jáne óńirlik BAQ-tan 50-den asa ótinim kelip tústi. Qazaqstandyq medıa sarapshylarynan turatyn Qamqorshylar keńesi ótinimderdi baǵalap, eń laıyqty degen úmitkerlerdi iriktep shyqty. Naryqtaǵy jumys tájirıbesi, saıttaǵy kúndelikti jarıalanymdar sany, jarıalanymdarda dinı jáne qylmystyq taqyryptardyń bolmaýy syndy ólshemder boıynsha baǵalaý júrgizildi.
«Uzaq ýaqytqa sozylǵan qyzý talqylaýdan soń, Qamqorshylar keńesiniń músheleri daýys berý arqyly jobaǵa qatysatyn 25 onlaın-basylymdy anyqtady. Bul basylymdar tek Astana men Almatydaǵy ǵana emes, sonymen birge óńirlerdegi ártúrli taqyrypta, baǵytta, ártúrli tilde shyǵatyn, ártúrli aýdıtorıamen jumys jasaıtyn BAQ bolyp tabylady. Tańdap alynǵan BAQ Qaznettiń jaǵdaıyn kórýge múmkindik beretin qazaqstandyq onlaın-medıanyń kesindisi bolyp tabylady. Jobaǵa qatysý arqasynda olar óz aýdıtorıasyn jaqsy túsinip, onymen jaqsyraq ózara árekettesip, sáıkesinshe jarnama berýshilerdi keńinen tartyp, kiris kózin arttyrýǵa múmkindik alatyndyǵyna senimdimin», - dep atap ótti jobanyń Qamqorshylar keńesiniń tóraǵasy Mıhaıl Dorofeev.
21 qarasha kúni Almatyda Qazaqstandyq BAQ naryǵyn damytý máselelerine arnalǵan XI «Media Quryltaı 2018» respýblıkalyq konferensıasy aıasynda medıa qaýymnyń Chartbeat ókilderimen kezdesýi ótedi.
- Atameken Business Channel
- Informburo
- Tengrinews.kz
- Massaget.kz
- Kazinform
- Qazaqstan
- 24.kz
- Baq.kz
- Baribar.kz
- Bnews.kz
- Qamshy.kz
- Astana TV
- Aikyn.kz
- Steppe
- Egemen.kz
- Kursiv.kz
- Vlast.kz
- Lıter
- Alash Aınasy
- Alaý TV
- Dıapazon
- Ult.kz
- Exclusive.kz
- Vesti.kz
- Ekspress K
İrikteýden ótken 25 onlaın-basylym endi Ortaq eseptegishti (panel) quryp, osynyń arqasynda jarnama berýshiler saıttyń tanymaldyǵy jaıly senimdi aqparat alatyn bolady. Joba qatysýshylary Ortaq eseptegishte qandaı kórsetkishterdiń kórsetiletinin daýys berý arqyly ózderi sheshedi.
Bir aıta ketetini, ozyq onlaın-metrıkalardy qoldanýǵa arnalǵan joba Qazaqstanda 2018 jyldyń qazanynda iske qosyldy. Joba operatory – Qazaqstan Baspasóz klýby. Joba Qazaqstandaǵy AQSH Elshiligi arqyly Inovasıalar qory esebinen qarjylandyrylady. Joba irikteýden ótken 25 BAQ-qa bir kúntizbelik jyl ishinde Chartbeat quraldaryn tegin qoldanýǵa múmkindik beredi. Ekinshi jyly Chartbeat jobanyń birinshi jylyna qatysqan 25 BAQ-qa 70%-dyq shegerim usynady. Onyń ústine, joba qatysýshylary kompanıa ókilderinen keńes alyp, oqýdan óte alady.
