Aqtaýda 3-4 qarasha kúnderi «Mańǵystaý-Arena» sport kesheninde dzúdodan Turar Joldybaevty eske alýǵa arnalǵan ashyq Azıa kýbogy ótti. Onda Qazaqstan, Qyrǵyzstan, Grekıa, Tájikstan, Mońǵolıa, Ózbekstan jáne Grýzıadan kelgen 100-den asa sportshy baq synady.

Týrnır 2009 jyldan beri dástúrli túrde uıymdastyrylyp keledi.

Saıysqa sporttyq jekpe jek jáne kúsh qoldanylatyn sport túrleri Konfederasıasynyń bas dırektory, Qazaqstan dzúdo federasıasynyń vıse-prezıdenti Eldos Ramazanov jáne Azıa dzúdo odaǵynyń sport dırektory Devıd Karter, Mańǵystaý oblysy dzúdo federasıasynyń prezıdenti Asylbek Joldybaev, Halyqaralyq antıadrolyq «Nevada-Semeı» qozǵalysynyń vıse-prezıdenti Sultan Kartoev, Qazaqstan dzúdo federasıasynyń bas hatshysy Asqat Jıtkeev, Qazaqstan dzúdo federasıasynyń atqarýshy dırektory Samat Jylqybaev, Álem chempıonatynyń jeńimpazdary men júldegerleri Maksım Rakov, Azamat Muqanov, Otgonseseg Galbadrah syndy elimizdiń betke ustar dzúdoshylary qonaq boldy.

Mańǵystaý oblysynyń ákimi Eraly Toǵjanov jarys aldynda qatysýshylarǵa sáttilik tilep, osyndaı úlken sharaǵa jınalǵandarǵa alǵysyn bildirdi.

Jarys nátıjesinde Qazaqstan quramasy 7 altyn, 10 kúmis, 13 qola júldeni enshilep, 1-orynǵa jaıǵasty. Grekıa quramasy 4 altyn medalmen 2-oryn, 1 altyn, 1 kúmis júldemen Tájikstan quramasy úshtikti qorytyndylady.

Ashyq Azıa kýbogy lısenzıalyq týrnır bolǵandyqtan, jeńimpazdar men júldegerlerge reıtıńtik upaılar beriledi. Birinshi oryn ıegerine álem reıtıńinde 100 upaı, ekinshi oryn alǵandar – 60 upaı, úshinshi oryn alǵandar 40 upaı beriledi.