16 jasar Nazıra Qydyrbaeva Aqtaýdaǵy Nazarbaev zıatkerlik mektebiniń 11-synybynda oqıdy. Jasandy qol tehnıkasy týraly zerttep júrgenine eki jylǵa taıaǵan. Buǵan onyń múmkindigi shekteýli jandarǵa degen qoldaý nıeti, qamqorlyǵy túrtki bolypty.
mangystaumedia.kz málimetinshe, Nazıra bul jobasy arqyly qarapaıym ári qoljetimdi qol protezin jasap shyǵarýdy maqsat etken. Saý qoldyń bulshyq etteri jıyrylǵanda dachıkten mıkro baqylaýshyǵa sıgnal keledi. Mıkrokontroller ony óńdep, motorǵa baǵyttaıdy. Kelgen sıgnalǵa sáıkesinshe servomotor saýsaqtardy jumyp nemese ashyp qımyl jasaıdy.
Jobanyń eń basty artyqshylyǵy — jobanyń iske asýyna qarajattyń az jumsalatyny. Bul dachıkterdiń basym bóliginiń qoldan jasalýyna baılanysty.
-Qoly joq adamǵa zattardy ustaýǵa múmkindik bolsa, qandaı jaqsy! Men jasandy qolmen zattardy alýǵa kómektesetin qurylǵy jasaýǵa tyrystym. Bul meniń alǵashqy tájirıbem. Eger tabysty bolyp jatsa, osyndaı qurylǵylar arqyly múgedekterge kómek kórsetýdi jalǵastyrǵym keledi. Bul quraldar óte qarapaıym jáne arzan bolýy kerek. Ónertabys múmkindigi shekteýli jandardyń ómirin jaqsartýǵa arnalǵan. Muny týa bitti jarym jandar nemese baqytsyz jaǵdaılar saldarynan qolyn joǵaltqan adamdar qoldana alady»,- deıdi ónertapqysh oqýshy.
Aqaýy bar qol jasandy materıaldan jasalǵan mehanıkalyq qolmen biriktiriledi. Ol belgili bir sıgnal berilgen soń, myqtap qysylady. Sıgnal sensor arqyly saý qolǵa qosylǵan qurylǵydan keledi. Sensorlar saý qoldyń bıseps jáne trısepsine ornatylyp, kúsh jumsap jatqanda sıgnal berýdi júzege asyrady. Qurylǵy kómegimen jasandy qol jumylady nemese ashylady.
Naryqqa sholý jasaǵan ónertapqysh qyz elimizde 100 mln. teńgege 50-70 adam protez saldyratynyn aıtady. Shamamen bir jasandy qol 2 mln teńgege jýyqtaıdy. Bul qarapaıym halyqtyń qaltasyna aýyrtpalyq salatynyn aıtady ol.
«Meniń tańdaǵan materıaldarymnan bir qol 500 myńǵa jýyqtaıdy, joba nátıjesin berse, 100 myń teńgege deıin tómendetýge múmkindik bolady,- deıdi Nazıra.
Oqýshynyń jobasyna bastapqy qarjy retinde 2 mln. 800 myń teńge qajet. Atalǵan qarajatty tabýǵa kómekteser jan tabylsa, jas ónertapqysh bolashaǵyn osy kásipti damytýmen baılanystyrmaq.
