Biraz buryn Qazaqstanǵa Altaıdan eki aýyldasym kóship keldi. Bireýi Shyǵys Qazaqstannyń Zaısan aýdanyna, ekinshisi Taldyqorǵannyń Kóksý aýdanyna qonystandy. Ekeýi de ekpindi jas jigitter, bala-shaǵasy bar.
Biraq, olarmen habarlasa qalsam kóshi-qon týraly zań ne bolyp jatyr dep suraıdy. Sebebi, turaqty tirkeýge tura almaı júr, yqtıar hat, azamattyq alyp ornyǵaıyn dese, jergilikti ákimdik «zań shyqpaı jatyr» dep keri qaıtarady. Jumys isteı bereıin dese qujaty joq, bireýi balasynyń pasportynyń ýaqyty bitip bara jatqanyn aıtady. Kelgeli jylǵa jýyqtady. Bastary sharadaı bolyp, máńgirip otyr.
Al, Parlament kóshi-qon zańyn «shaldyń aýzyndaǵy saǵyzdaı» sozyp, áli myjǵylap jatyr. Azamattyq alýdy bir jylǵa qysqartamyz dep, ótirik emeksitkeli de eki jylǵa jýyqtady. Ara-tura, Dúısenova, Qarjaýbaev taǵy basqalar «bóıtkeli jatyrmyz, sóıtkeli jatyrmyz» dep aldaýsyratyp qoıady. Olar «óıtip-bóıtip» bolǵansha qolynda qujaty joq aǵaıyn omalyp otyra ma? Ana syltaý, myna syltaýmen kelgen qazaqtyń júıkesin, shydamyn taýsyp, kelmegen qazaqtyń betin qaıtaryp, áıetýir ulttyń berekesin qashyrýdyń jymysqy tásilin istep-aq jatyr. (Jaǵdaıǵa qaraı osylaı oılaýǵa májbúr bolasyń.)
Eger, Prezıdent tez qarańdar dep naqty tapsyrma berse, týlaqsha tartqylap júrgen zańdy depýtattar bir aptada ózgertip, daıyn qylar edi. Biraq, ondaı tapsyrma jańa saılaýǵa túskeli jatqan Prezıdentten bolmaı tur. «Básekelesterimen» bolatyn saılaýǵa qyzý kirisip, qoly tımeı jatqan sekildi. Múmkin, saılaýdan keıin zańdy ózgertip, úmittenip júrgen qandastardyń kóńiline qýanysh syılar, olaı bolmasa kelgen qazaqtyń kúni qıyndaı túsedi...
Murat Almasbekuly, Facebook paraqshasynan
