Keshe «Dostyq úıinde» Fılosofıa, saıasattaný jáne dintaný ınstıtýtynyń uıymdastyrýymen «Tarıhı sanany jańǵyrtý aıasyndaǵy qazirgi zamanǵy gýmanıtarlyq bilim men ǵylymnyń jańa kókjıekteri» atty halyqaralyq ǵylymı-tájirıbelik konferensıa bolyp ótti. Elbasynyń «Uly dalanyń jeti qyry» baǵdarlamalyq maqalasyn talqylaýǵa arnalǵan jıyn Fılosofıa, saıasattaný jáne dintaný ınstıtýtynyń 60 jyldyǵyna oraı uıymdastyryldy. Basqosýǵa birqatar qoǵam qaıratkerleri, joǵary oqý oryndarynyń basshylary, otandyq jáne sheteldik ǵalymdar qatysty, dep habarlaıdy Qamshy.kz aqparat agenttigi Almaty aqshamy basylymynyń deregine súıene otyryp.
Konferensıa qazaqstandyq áleýmettik ǵylymdardyń tarıhı jolyn, memleket pen qoǵam aldynda turǵan mindetterdi júzege asyrý boıynsha negizgi nátıjeler men bolashaǵyn zerdeleý maqsatyn kózdedi.
Konferensıa qazaqstandyq fılosofıa mektebi: qoǵamdyq sanany jańǵyrtýdyń jańa kókjıekteri, Qazaqstannyń ózindik ereksheligin qalyptastyrýdaǵy saıasattaný ǵylymynyń róli, qazirgi zamanǵy dintanýlyq zertteýler: ádisnamasy, tájirıbesi jáne keleshegi atty úsh seksıa aýqymynda ótkizildi.
Jıyndy kirispe sóz sóılep ashqan Fılosofıa, saıasattaný jáne dintaný ınstıtýtynyń dırektory Aqan Bıjanov onyń tynys-tirshiligimen jan-jaqty tanystyryp, qazirgi tańda «Bolashaqqa baǵdar: rýhanı jańǵyrý» jáne «Uly dalanyń jeti qyry» baǵdarlamalyq maqalalary aıasynda júzege asyrylyp jatqan irgeli isterdi atap ótti. Basqosý barysynda Qazaqstan Respýblıkasy Bilim jáne ǵylym mınıstrligi Ǵylym komıteti tóraǵasynyń orynbasary Asqar Jarkenov QR Bilim jáne ǵylym mınıstri Erlan Saǵadıevtiń quttyqtaý hatyn, al Almaty qalasy İshki saıasat basqarmasynyń basshysy Nurlan Sydyqov Almaty qalasynyń ákimi Baýyrjan Baıbektiń jyly lebizderge toly quttyqtaý hatyn ınstıtýt basshysyna tabystady. Sondaı-aq, QR Ulttyq Ǵylym akademıasynyń prezıdenti Murat Jurynov, ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov, Abaı atyndaǵy pedagogıkalyq ýnıversıtetiniń rektory Takır Balyqbaev jáne taǵy basqalar ınstıtýt ujymyn quttyqtap, egemen elimizdiń damýyndaǵy onyń qosqan úlesi úlken ekendigin atap ótti.
1958 jyly otandyq Ǵylym akademıasynyń quramynda qurylǵan Fılosofıa, saıasattaný jáne dintaný ınstıtýty sol kezde Fılosofıa jáne quqyq ınstıtýty bolyp atalǵan jáne dıalektıkalyq logıka, quqyqtaný jáne ǵylym ádisnamasy salalarynda iri zertteýler júrgizgen. Ǵylymnyń osy salalaryndaǵy eleýli jetistikterdiń arqasynda ınstıtýt SSRO-da jáne odan tys jerlerde keńinen tanyldy. Instıtýttyń jumysy S.Z.Zımanov, J.M.Ábdildın, M.T.Baımahanov, A.N.Nysanbaev tárizdi akademıkterdiń jáne taǵy basqa áleýmettik-gýmanıtarlyq bilim salasyndaǵy kóptegen belgili mamandardyń esimderimen tyǵyz baılanysty boldy. Búgingi tańda ınstıtýt Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgendeı, qoǵamdyq sananyń jańa baǵdarlaryn ǵylymı turǵyda negizdeýdi ózine mindet etip qoıady.
