Almaty ekonomıkasyndaǵy shetel ınvestısıasy bir jylda 24 paıyzǵa artty. Búgin qalada dástúrli 6-shy Almaty Invest halyqaralyq ınvestısıalyq forýmy ótti. Mańyzdy sharaǵa álemniń 20 elinen 500 delegat qatysty. Osy rette, otandyq iskerlermen qosa ózge eldiń qaltalylary da ońtústik astanaǵa aqsha quıǵan tıimdi ekenin alǵa tartty.

Almaty Invest halyqaralyq ınvestısıalyq forýmy bedeldi saıasatkerlerdiń, otandyq jáne dúnıejúzilik bıznestiń kóshbasshylarynyń, ınvestısıalyq korporasıalar, qarjy ınstıtýttary men halyqaralyq uıymdar jetekshileriniń basyn qosty. Bul alań túrli saladaǵy iri jobalardy talqylap, kelisimshartqa qol qoıýǵa taptyrmas oryn. Osy ýaqytqa deıin uıymdastyrylǵan forýmda quny 1 mıllıard dollarǵa 40 memorandýmǵa qol qoıylǵan. Onyń ishinde, 12 joba qazirdiń ózinde tabysty jumys istep keledi.

«Almaty – shıkizattyq emes ekonomıkasy 35 mıllıard dollardy quraıtyn Ortalyq Azıadaǵy eń damyǵan megapolısterdiń biri. Alyp shahar elimizdiń jalpy ishki óniminiń besinshi bóligin jáne salyq túsiminiń 4/1 bóligin beredi. Jalpy, óńirlik ónim jan basyna shaqqanda 20 myń dollardy quraıdy. Qalamyzǵa halyqaralyq kompanıalar ınvestısıany belsendi quıýda. 10 jylda shaharymyzǵa 22,2 mıllıard ınvestısıa tartyldy. Bıylǵy jyly ınvestısıa kólemi 25 paıyzǵa, sonyń ishinde sheteldik ınvestısıalar 24 paıyzǵa artty. Elbasynyń sarabdal saıasatynyń arqasynda Táýelsizdik jyldarynda megapolıs ekonomıkasy 100 esege, halyq tabysy 21 esege artty», – dedi Almaty qalasynyń ákimi Baýyrjan Baıbek.

Almaty bıznesmender úshin óte qolaıly qala. Syrttan kelgen qarjygerlerge de barlyq jaǵdaı jasalǵan. Tipti, zaýyt salyp, óndiris ashý úshin ınfraqurylymdary daıyn, jer telimi beriledi. Indýstrıaldy aımaqta qurylys, farmasevtıka, hımıa, tamaq, mashına jasaý jáne jeńil ónerkásip salalary boıynsha otandyq iri jáne sheteldik 40 joba júzege asýda. Olardyń jalpy quny 600 mıllıon dollardy quraıdy. «Tokyo Rope Almaty» Tokıo qarjy bırjasy reıtıńisinde eń joǵary baǵany alǵan. Sondaı-aq, ınovasıalyq tehnologıalar parki erkin ekonomıkalyq aımaǵynda 163 gektar aýmaqta joǵary tehnologıalyq kompanıalardyń jumys isteýine qajetti múmkindik jasalǵan.  

«Memleket basshysynyń joldaýyn iske asyrý úshin biz qarapaıym zattardyń ekonomıkasyn belsendi damytýdamyz. Mysaly, jyldyń sońyna deıin KazTigerTape skochtar men plenkalardy óndirý, «KELET» gaz qazandyqtaryn óndirý, «InterMýltıServıs» karton men qaǵaz óndirý jobalary iske qosylatyn bolady», – dedi Baýyrjan Baıbek.

Qala ákimi Baýyrjan Baıbek alyp shaharda anyqtalǵan qurylys salýǵa bolatyn aımaqty atap ótti. Onyń ishinde, Túrksib, Jetisý jáne Alataý aýdandarynda bos jer bar. Boljam boıynsha 70 sharshy shaqyrym turǵyn úı, áleýmettik, óndiris, keńse jáne saýda alańdary qajet. Bıyl «7-20-25» baǵdarlamasy aıasynda 2 mıllıon sharshy metr turǵyn úı turǵyzylady. Sondaı-aq ınvestor men týrıs tartýda sapaly medısınalyq qyzmet kórsetý joǵary mańyzǵa ıe.

«Bızneste ónerkásip jáne jańa kásiporyndardy ashýǵa qarjy kóp bólinedi. Qazir tendensıa boıynsha áleýmettik jobalardy jetildirýge kóńil bólinýde. Onyń ishinde medısına, jol qurylysy, qala ınfraqurylym, bilim berý nysandary bar. Inovasıalyq tehnologıalar da basym baǵytqa ıe. Bizdiń baıqaǵanymyzsha, Almaty osy barlyq baǵyt boıynsha damyp keledi. Almatynyń ınvestklımaty óte tartymdy. Munda kóptegen halyqaralyq uıymdar jumys istep keledi», – dedi Ortalyq Azıa boıynsha IFC aımaqtyq basshysy Kasandra Kolbert.

Qalada sońǵy 10 jylda 30 jol aıryǵy salynǵan. Jýyrda taǵy úsheýi qoldanysqa berilmek. Odan bólek, memlekettik jeke menshik áriptestik aıasynda Úlken Almaty aınalma joly «Batys Eýropa – Batys Qytaı» dálizinyń qurylysy bastalǵan. Joba quny 1,4 mıllıard dollardy qurap otyr. Odan bólek, alyp shaharda BRT jelisi jumysyn bastady. Osy arqyly avtobýs pen troleıbýstar júıitkip, jolaýshylar legi edáýir arta túspek. Sonymen qatar, júrginshilerge arnalǵan joldar kóbeıgen. Danıalyq sáýletshi Ian Geıldiń jobasyna sáıkes, qalany turǵyndarǵa qolaıly etý tujyrymdamasy satylaı júzege asyrylyp jatyr.

«3 jyl buryn biz bızneske kedergi keltirý kerek emes ekenin tek tilge tıek etip júrdik. Qala ákimi turǵyndarǵa qolaıly jaǵdaı jasaý qajettigin alǵa tartqan. Qazir onyń ınfraqurylym da, jobalaý da jolǵa qoıylǵan. Panfılov kóshesinde retsiz turǵan saýda oryndary súrilgen. Bul túsinbeýshilik týǵyzýy múmkin edi. Alaıda, turǵyndarǵa jaǵdaı jasalyp jatqanyn da bıznes ókilderi túsiný kerek», – dedi «Atameken» UKP basqarma tóraǵasy Abylaı Myrzahmetov.

Bıyl Halyqaralyq ınvestısıalyq forýmǵa TMD, Malaızıa jáne AQSH syndy elderden 500 delegat jınaldy. Shara baǵdarlamasyna eki ózgeris engizilgen. Inovasıalyq startaptar kórmesi jáne Kremnıı dalasynyń ınnovatorlary men ınvestorlary ótkizgen sheberlik sabaqtary.