Almatyda dańqty mánerlep syrǵanaýshy Denıs Tenniń qurmetine eskertkish taqta ilindi. Saltanatty rásimge kezinde sportshyny qajyr-qaıratymen baýlyǵan jattyqtyrýshysy, SSRO-nyń eńbek sińirgen sport sheberi Tatána Tarasova arnaıy keldi. Álemge áıgili bapker talantty shákirti týraly estelikterimen bólisip, Denıstiń Qazaqstandy dúnıejúzine tanytqan uly tulǵa ekenin aıtty. Sondaı-aq, búgin «Muz koroli» atanǵan sportshy atyndaǵy qoǵamdyq qor óz jumysyn bastady.
Qapyda qaza taýyp, búkil qazaqstandyqtardyń qabyrǵasyn qaıystyrǵan Denıs Tenniń esimin máńgi este qaldyrý úshin búgin sportshynyń qurmetine eskertkish taqta qoıyldy. Memorıaldyq taqtaısha Nazarbaev dańǵylyndaǵy mánerlep syrǵanaýshynyń ózi týyp-ósken úıiniń týra aldyna ornatyldy. Saltanatty sharaǵa Denıstiń jaqyndarynan bastap, onyń ónerine bas ıetin jankúıerleri kóp jıyldy. Al Denıs Tenniń jattyqtyrýshysy bolǵan, SSRO-nyń eńbek sińirgen sport sheberi Tatána Tarasova men tanymal mánerlep syrǵanaýshy Elena Radıonova Reseıden arnaıy keldi. Dańqty bapker gúl shoqtaryn qoıyp, Denısti kózine jas alyp eske aldy.
«Ol – uly adam. Týǵan jerin eshbir memleketke aıyrbastamaı, osy eldiń dańqyn shyǵarǵysy keldi. Ókinishke qaraı, ózi jaqsy kórgen elinde ólim qushty. Onyń ónerin tamashalaǵan mıllıondaǵan adam kartadan Qazaqstan degen eldi izdedi. Qazaqstannyń qaıda ornalasqanyn barlyǵy bile bermeıtin. Denıs arqyly kópshiligi osy el jaıynda bilgeni – shyndyq. Ol halqynyń dańqty uly. Maǵan onymen jumys isteý baqyty buıyrdy. Kóp shákirt tárbıelesem de, eshkim Denıstiń ornyn basa almaıdy. Óıtkeni, ol óte erekshe adam boldy», – dedi SSRO eńbek sińirgen bapkeri Tatána Tarasova.
Rasymen de Denıs Tendi kópshilik san qyrynan biledi. Ol túrli dodalarda kók baıraǵymyzdy jelbiretip, mıllıondaǵan halyqtyń kókeıine maqtanysh sezimin uıalatqan birtýar jan edi. Sóıte tura qarapaıymdylyǵyn saqtap, kishipeıil kúıinde el esinde qaldy. Qazaqstanda mánerlep syrǵanaý sportyn damytyp, ónerdiń osy túrine jurtshylyqtyń qyzyǵýshylyǵyn oıatý úshin aıanbaı eńbek etti.
«– Denıs Tendi men Olımpıadaǵa qatysqan kishkentaı kezinen bilemin. Men onyń tabynýshysy bolǵanmyn. Qaıǵyly jaǵdaıdy estigende qatty janym aýyrdy, onyń joq ekenine áli kúnge deıin senbeı júrmin...
– Denıs Ten men úshin, bárimiz úshin naǵyz qaharman! Ol bárimizge úlgi bola bildi...
- Balýan Sholaq atyndaǵy saraıda ótken shyǵaryp salý rásimine jınalǵan halyqty kórip, Denıs Tenniń qanshama halyqtyń júreginde ekenin kórdim, onyń bizben máńgi birge bolatynyna sendim...», – dep tebirenedi sharaǵa arnaıy kelgen qala turǵyndary.
Buǵan qosa, búgin Denıs Ten atyndaǵy qoǵamdyq qordyń keńsesi ashyldy. Onda mánerlep syrǵanaýshynyń kózi tirisinde aıaqsyz qalǵan barlyq jobalary júzege asyrylady. Denıstiń ánderi, kınoǵa jazylǵan senarıleri jaryqqa shyǵady. Eń bastysy, Denıstiń basty armany – Qazaqstandaǵy jas mánerlep syrǵanaýshylardyń damýyna jaǵdaı jasalady. Qor qyzmetkerleri álemge áıgili sport sheberlerin shaqyryp, jastarǵa sheberlik sabaqtaryn uıymdastyrmaq. Reseılik tanymal sport sheberleri osyndaı ıgi iske óz úlesterin qosyp úlgerdi.
«Denıs ekeýimiz dos boldyq. Ol únemi kóńildi júretin, qyzyqty áńgimelerin tyńdaı bergim keletin. Óte jan-jaqty, barlyq jaǵynan talantty jan boldy. Sondaı-aq óte eńbekqor, bilimdi, mádenıetti jáne kishipeıil adam edi. Ondaı adamdar óte sırek. Onyń jarqyn beınesi bizdiń esimizde máńgi qalady. Qazirgi syrǵanaǵan qoıylymymdy Denıstiń shoýynda oryndaǵan edim. Endi mine, dosymnyń qurmetine arnap bıledim. Biz Denıs bastaǵan jobalardy óshirmeı, isin jalǵastyrýǵa qolǵabys etýge daıynbyz», – dedi Reseıdiń mánerlep syrǵanaýshysy Elena Radıonova.
Týǵan eliniń abyroıyn asqaqtatý úshin mańdaı terin tógip, orasan eńbek etken, biraq qapıada qyrshynynan qıylǵan Denıstiń esimin halqy eshqashan umytpaıdy. Osy rette qalada turaqty túrde túrli sharalar ótkizilmek. Jergilikti ákimdik jyl saıyn Denıs Ten atyndaǵy halyqaralyq týrnır uıymdastyrmaq. Sondaı-aq kóktemde mánerlep syrǵanaýshyǵa arnap eskertkish turǵyzbaqshy. Qazir sportshynyń anasymen birge bolashaq músinniń eskızi jasalyp jatyr eken.
