Forýmǵa Qazaqstan Respýblıkasy Parlamenti Májilisiniń depýtattary, ǵalymdar, oqý oryndarynyń oqytýshylary, qoǵam qaıratkerleri, dinı birlestikter, memlekettik organdardyń ókilderi, kópbalaly batyr-analar men stýdentter qatysty.  İs-shara baǵdarlamasynda  «Qoǵamnyń damýy men rýhanı jańǵyrýyndaǵy áıelderdiń roli»; «Islam jáne qazaq halqynyń ulttyq qundylyqtary»; «Dindegi áıel-analar mártebesi men roli»; «Din, qoǵam jáne otbasylyq qundylyqtar»  sekildi taqyryptar qarastyryldy. Forýmda Qazaqstan Respýblıkasy Prezıdentiniń keńesshisi, Prezıdent janyndaǵy Áıelder isteri jáne otbasylyq demografıalyq saıasat jónindegi ulttyq komısıanyń tóraıymy G.N.Ábdiqalyqova sóz sóılep, qoǵamdaǵy jalpyadamzattyq qundylyqtardy damytý men óskeleń urpaqqa tárbıe berýdegi áıel-ananyń rólin jáne názik jandylardyń saıasatqa aralasýyna barlyq jaǵdaılardyń jasalýy qajettigin atap ótti.

Qazaqstan Respýblıkasy halqynyń sanaǵy nátıjeleri boıynsha el turǵyndarynyń sany 16009,6 myń adamdy qurasa, olardyń  8297,4 myńy áıel qaýymynyń ókilderinen turady. Qazaqstan álemniń  135 eliniń ishinde genderlik teńdik kórsetkishteri boıynsha 31 orynǵa kóterildi. Qazirgi tańda memlekettik qyzmetkerlerdiń  60%-yn áıelder quraıdy, al sot júıesinde – 61%, sotta – 42%, Parlament depýtattary arasynda – 34%, kásipkerlikte – 40% áıel azamattar qyzmet atqarady. Elbasy N.Á.Nazarbaev «Qazaqstan-2050» strategıasy – qalyptasqan memlekettiń jańa saıası baǵyty» atty Qazaqstan halqyna Joldaýynda: «Memleket úshin jáne meniń jeke ózim úshin de anany qorǵaý – erekshe másele. Qymbatty hanymdar! Sizder – otbasynyń demek, memlekettiń tiregisizder.  Elimizdiń bolashaqta qandaı bolatyny balalarymyzdyń boıyna ózimiz qandaı tárbıeni sińiretinimizge tikeleı baılanysty. Eń aldymen, biz qyzdarymyzdyń tárbıesine kóp kóńil bólýimiz kerek. Olar – bolashaq jar, bolashaq ana, shańyraqtyń shyraqshylary», - deı kele: «Biz áıel zatyna – anaǵa, jarǵa, qyzǵa degen qapysyz qurmetti qaıta oraltýǵa tıispiz», - dep aıryqsha atap ótken bolatyn. Qazaqstan Respýblıkasy Din isteri agenttiginiń tóraǵasy Qaırat Lama Sharıf óz sózinde bul Forýmnyń elimizde tuńǵysh ret «Áıel jáne din» ataýymen biregeı oqý ordasy – Qazaq memlekettik qyzdar pedagogıkalyk ýnıversıteti qabyrǵasynda ótýiniń ózimen-aq rámizdik jáne tarıhı mánge ıe bolyp turǵanyn basa aıtty. Forýmda qarastyrylǵan taqyryptardyń ózektiligi búginde elimizde qazaq mádenıeti men salt-dástúrlerin joqqa shyǵaratyn, hıjab kıinip, qoǵam ómirinen alshaqtaǵan qyzdar sanynyń arta túsýimen de baılanysty bolyp otyr. Olardyń kópshiligi óz qaýymdarynyń aıasymen shektelip, tuıyqtalýda. Bul rette Q.Lama Sharıf áıelderdiń dindegi quqyqtary jóninde oı qozǵaı otyryp, Qasıetti Quranda er men áıeldiń Alla aldyndaǵy quqyqtary men mindetkerlikteri birdeı ekendigin kýálandyratyn tustardyń kóptigin aıryqsha atap ótti. Qazaq halqynda áıelder kúndelikti ómirde júzin jaýyp júrmegen, ózgelerden oqshaýlanyp nemese erleriniń ruqsatynsyz basqalarmen sóılesý quqyǵynan aıyrylyp kórgen emes. Qazaq tiliniń baı da qunarly sózdik qorynda «hıjab» uǵymy joqqa tán. Forým barysynda Qazaq memlekettik qyzdar pedagogıkalyk ýnıversıtetiniń kesheninde uıymdastyrylǵan «Qyz Jibek» klýbynyń tusaýkeseri ótti. Bul bastamanyń basty maqsaty – qyzdardy ulttyq dástúrler men tól dúnıetanym aıasynda tárbıeleý jáne olarǵa ozyq zamanaýı qundylyqtardy sińirý. Uıymdastyrýshylar «Qyz Jibek» klýbynyń aıasynda ózindik tárbıe mektebiniń qalyptasýyn kózdeıdi. Iaǵnı, klýb aldyńǵy býyn ókilderi men zamandas qurbylardyń syrlasyp, pikir almasatyn suhbat alańyna aınalýǵa tıis. Bolashaqta klýb tájirıbesi ıgi bastama retinde elimizdiń basqa da aımaqtaryna taralatyn bolady, sondaı-aq osy tektes klýbtar elimizdiń ózge de joǵarǵy oqý oryndarynda ashylady.