Almaty oblysynda ótken jyldyń mamyr aıynda zorlanǵan boıjetken sumdyq jaıtty aıtyp berdi. Onyń oqıǵasyna qatysty qylmystyq is qozǵalǵannan keıin zorlaý faktisin anyqtaý úshin prosedýra jasalǵan. Sol kezde jábirlenýshini gınekologıalyq quralmen teksermek bolǵan dáriger onyń áıeldik organdaryn zaqymdaǵan dep habarlaıdy Qamshy.kz aqparat agenttigi 31 arnanyń deregin negizge alyp.
Boıjetkenniń sózinshe, ótken jyldyń mamyr aıynda úıine otbasynyń tanysy bolǵan er adam qonaqqa kelgen. Bul kezde ata-anasy úıde bolmapty. Eshkimniń joǵyn paıdalanǵan er adam qyzdy zorlaǵan. Artynsha boıjetken telefon arqyly ákesine habarlasyp úlgergen. Munan keıin kúdikti qolǵa tústi. Alaıda qylmystyq is burmalanyp, kúdikti áli kúnge deıin qamalmaǵan. Ol azdaı, jábirlenýshiniń aıtýynsha, qyz zorlaý deregin anyqtaý kezinde dáriger onyń jynys organdaryna zaqym keltirgen.
«Ýchaskelik ınspektor maǵan qarap turdy. Men uıalatynymdy aıtyp, onyń shyǵyp ketýin suradym. Sol kezde dáriger aıqaılaı bastady. «Shyqpaıdy ol, kórsin», – dedi. Sol prosedýradan keıin densaýlyǵyma zaqym keldi. Osy kúnge deıin aýyryp júrdim. Temir uzyn qaıshymen jatyrymnyń arǵy jaǵyna deıin úsh ret qatty tyǵyp jiberdi. Sodan 5 kún boıy qan toqtamady», – deıdi jábirlenýshi.
Taıaýda İle aýdandyq ishki ister bólimi jábirlenýshiden dárigerdiń áreketiniń saldarynan alǵan jaraqatyna qatysty jaýap alypty. Onda da «Ne molchı. KZ» toby bul máseleni áleýmettik jelide kótergennen keıin ǵana polısıa qozǵala bastapty,- deıdi qoǵamdyq qozǵalys jetekshisi.
«Qylmystyq isten gınekologtyń jábirlenýshini qaraǵany týraly qujat joǵalyp ketti. Ol dáriger: «Psıhıkalyq aýrýhanada esepte turmaısyń ba? Nege lassyń? Jýyna almaısyń ba?» – dep suraǵan. Zorlanǵan, qorlyq kórgen qyzǵa osylaı dórekilik tanytqan. Sáýle gınekologtyń medısınalyq quraldarmen denesin odan ári zaqymdaǵanyn aıtty. Sodan keıin 5 kún boıy qan ketip aýyrǵan», – deıdi «Ne molchı.KZ» qoǵamdyq qozǵalysynyń jetekshisi Dına Tańsári.
Almaty oblystyq polısıa departamentindegiler oqıǵaǵa qatysty jabylǵan istiń qaıta ashylǵanyn aıtty. Endigi bul is Almaty oblystyq ishki ister departamentiniń tikeleı baqylaýyna alynady.
«Tergeý jumystary jalǵasyp jatyr. Sebebi Almaty oblystyq PD-nyń prokýratýraǵa joldaǵan ótinishi negizinde isti qysqartý týraly qaýlynyń kúshi joıyldy. İs boıynsha tergeýdiń jan-jaqtylyǵyn, tolyqtyǵyn, obektıvtiligin qamtamasyz etý maqsatynda sotqa deıingi tergeý amaldaryn oblystyq tergeý basqarmasy óz óndirisine aldy», – deıdi Almaty oblystyq PD baspasóz hatshysy Serik Úpıev.
