2019 jyldan bastap elimizde Ulttyq biryńǵaı testileý qańtar, naýryz, maýsym jáne tamyz aıynda tórt márte ótkiziletin boldy. Bilim jáne ǵylym mınıstrliginiń aqparatyna súıensek, UBT-nyń jalpy formaty ózgermeıdi. Qańtar, naýryz jáne tamyzdaǵy test joǵarǵy oqý oryndaryna aqyly bólimge túsetin túlekter úshin ótkizilmek dep habarlaıdy Qamshy.kz aqparat agenttigi

UBT-ny qańtarda tapsyrǵandar maýsym aıynda da tapsyra alady jáne memlekettik bilim berý granttaryn berý konkýrsyna qatysa alady.
Talapker UBT -ny ózine yńǵaıly kez-kelgen pýnktte tapsyra alady. Tek testileýge qatysý úshin UBT ótkizý pýnktine kórsetilgen, tıisti merzimde ótinish berýi qajet.

Eske sala keteıik, 2018 jyldan bastap ár túlekke UBT sertıfıkatymen birge, bilim berý baǵdarlamalarynyń tizimi, bólingen granttardyń sany, sondaı-aq, ótken jylǵy granttar konkýrsynyń nátıjeleri jazylǵan aqparattyq paraqsha beriledi. Atalǵan aqparattyq paraqsha túlekke óziniń bolashaq mamandyǵyn tańdaý kezinde úlken kómegin tıgizedi. 

Eskerte keteıik, UBT alǵash ret 1999 jyly engizildi. 2017 jylǵa deıin UBT úsh fýnksıany atqardy: 11 jyldyq oqýdy aıaqtaý qorytyndysy retindegi bitirý emtıhany, joǵary oqý oryndaryna túsý emtıhany jáne túlekterge memlekettik granttardy taǵaıyndaý mehanızmi. Endi qorytyndy atestattaý nemese bitirý emtıhandary mektepterde ótkiziledi, al UBT – joǵary oqý ornyna túsý jáne memlekettik granttardy taǵaıyndaý emtıhany bolyp qalyp otyr. UBT bir kezeńnen turady jáne 140 baldyq mejemen baǵalanady. Oqýshylar bir kúnde úsh mindetti pánnen (Qazaqstan tarıhy, matematıkalyq saýattylyq, oqý saýattylyǵy) — árqaısysynda 20 tapsyrmadan jáne eki beıindi pánnen — árqaısysynda 30 tapsyrmadan test tapsyrady. Alǵash engizilgenine 20 jyl bolǵan bilim synaǵy 2019 jyly 16-ret ótkiziledi. Osy jyldar ishinde UBT-ǵa 1,5 mln astam mektep bitirýshi qatysty. Bul barlyq mektep bitirýshilerdiń 80%-yn quraıdy.