Taldyqorǵan oblystyq aýrýhanasynda emdelgen áıeldiń týystary onyń ólimine dárigerlerdi kinálap otyr. "Dárigerler anamyzǵa basqa toptyń qanyn quıǵannan soń jaǵdaıy kúrt tómendep ketti", deıdi jaqyndary. Soraqysy aýrýhanaǵa óz aıaǵymen kelgen naýqas bir aıdan soń qaıtys bolǵan.

Bul týraly Qamshy.kz aqparat agenttigi 31 arnanyń deregin negizge ala otyryp habarlaıdy. 

Taldyqorǵanda oblystyq aýrýhanada dárigerler naýqasqa basqa toptyń qanyn quıyp jatqanyn bilmegen. Óıtkeni dárigerler 4-shi toptyń qany kórsetildi, sol boıynsha qan quıyldy dep aqtalyp otyr. Al shyn mánisinde naýqastyń qan toby 4-inshi emes, 3-inshi top bolyp shyqqan. Al gemoglabıni 50-di kórsetip turǵan naýqasqa basqa toptyń qanyn aýrýhananyń dárigerleri 4 ret quıǵan.

«Eki ret quıǵanda eki búıregi isten shyqqan, pnevmonıa bolǵan. Sodan 3, 4-ret quıǵannan keıin jaǵdaıy múlde nasharlaǵan. 4 márte quıyp tastaǵannan keıin qan tobyn anyqtaǵan», – deıdi marqumnyń qyzy Qarlyǵash Qaıypbekova.

Eń soraqysy, dárigerler naýqasqa basqa toptaǵy qan quıylǵany týraly tis jarmaǵan. Aınalasy bir aıdyń ishinde Anarhan Qyrǵyzbaevaǵa 3-toptyń da, 4-toptyń da qanyn quıyp tastaǵan.

«Qan tobyn durys anyqtamaǵanymyzdy moıyndap otyrmyz. Sonymen qatar aýyr dert bolǵannan keıin, ony súıinshilep aıtpaımyz ǵoı. Úshinshi, tórtinshi ret qan quıylǵannan keıin bul aýrýdyń damýyn qozdyryp jiberdi dep aıtýǵa bolady», – deıdi Almaty oblystyq aýrýhananyń bas dárigeri Murat Rahmetov.

Al naýqastyń qan aýrýyna shaldyqqanyn bile tura oblystyq aýrýhananyń dárigerleri qan tobyn birden durystap anyqtamady dep kinálaıdy anasynan aıyrylǵan qyzy.

«Qan aýrýy ekenin bile tura tereń zertteýi qajet edi. Men dáriger emespin. Dese de tereń zerttegen jaǵdaıda, qan toby 4-inshi emes, 3-inshi top ekeni anyqtalady. Ókpesi, búıregi, barlyq aǵzasy isten shyqqansha qınady. Anam solaı óldi», – deıdi marqumnyń qyzy.

Qarlyǵash Qaıypbekovanyń sózinshe, dárigerler jalǵan qujatty da jasap úlgergen. Anasyn on kún buryn ǵana jer qoınyna tapsyrǵan balalary endigi prokýratýraǵa, tıisti mekemelerge aryzdaryn úlgerdi. Qaıǵydan qan jutqan otbasy elimizdiń Bas prokýratýrasy dál osy isti baqylaýyna alsa deıdi.

Usynǵan: Ásel Bolatqyzy