Osydan bir aıdaı buryn túrmeden shyqqanyn habarlaǵan Aısultan Nazarbaev elge oralǵannan keıingi qıyndyqtary jaıly Facebook-tegi paraqshasyna kezekti jazba jarıalady. Orys tilinde jazylǵan jazbasyn Qamshy.kz aqparat agenttigi qazaq tiline aýdaryp, oqyrman nazaryna usynyp otyr.

Prezıdenttiń jıen nemeresi qazaqstandyq memlekettik organdardan ábden kóńili qalǵan syńaıly. Bizge belgilisi, Reseıdegi túrmeden birde-bir qujatsyz oralǵan Nazarbaev bar qujatyn qaıta jasatý úshin memlekettik organdarǵa júgingen bolatyn. Ári qaraıǵy jaǵdaıyn Aısultan Nazarbaev bylaı jazypty:

Týǵan jer degendi qalaı túsinesizder? Bázbireýler úshin ol qujatynda belgilengen jer ǵana. Endi biri úshin ózin jaıly sezinetin meken. Al keıbiri memleketine túp-tamyrymen baılanǵan, pasportyńda aty jazylǵan ba, joq pa mańyzdy emes, eń bastysy ol mekende ózin jaqsy sezinedi.

Men ártúrli memlekette turdym, oqydym, biraq Otanym, atamekenim – Qazaqstan ekenin eshqashan umytqan emespin. Bilip qana qoıǵan joqpyn, júregimmen sezdim. Alaıda dál qazirgi jaǵdaı muny taǵy bir ret qattyraq sezinýime múmkindik jasap otyr.

♦Aısultan Nazarbaev bıliktegi jaǵympazdardy synǵa aldy

Bul úshin qazaqstandyq mıgrasıa qyzmetine jáne İİM-ne alǵysym zor. Solardyń arqasynda men qazir kýáliksiz júrgen adammyn, jaǵdaıym jaqsy dep aıta almaımyn, alaıda Qazaqstanǵa degen sezimime nuqsan keltirgen joq.

♦Aısultan Nazarbaev: Men bostandyqqa shyqtym...

Jekemenshik reseılik túrmeden shyqqan soń úıime birde bir qujatsyz oraldym – bári urlanǵan, joıylǵan edi. Ol jerge meni «túzý nıetti» adam ornalastyrdy, al shynynda men oǵan senýim kerek edi. Sol sebepti elge oralǵanda eshkimniń kómegine súıenbeı, kádimgi azamat retinde qujattarymdy qaıta jasatý úshin qazaqstandyq organdarǵa júgindim.

Bizdiń memlekettik organ – naǵyz tozaqtyń ortasy. Bir mekemeden ekinshi bir mekemege júgirtip qoıdy: İİM, mıgrasıalyq qyzmet, AHAJ... Biraq árqaısysy meniń jaǵdaıymda ne isteý kerektigin bilmedi, qaýqarsyz boldy. Qoldaryn bir siltedi. Shynymdy aıtsam, kásibı mamandy jolyqtyra almadym. Bul másele men úshin asa mańyzdy edi, alaıda bul eshkimdi tolǵandyrmady, men óz Otanymnyń azamattyǵynan aıyryldym. Olar kádimgi tiri adammen sóılesip tur, biraq men olarǵa masyl ekenmin, sebebi artyq qımyldaǵylary joq.

♦Aısultan Nazarbaev: Esirtkiden qutylýyma atamnyń senimi sebep boldy

Men – Prezıdenttiń nemeresimin, barar jer, basar taý tabaryma senemin. Kimnen kómek surarymdy da bilemin jáne mindetti túrde baramyn. Alaıda qarapaıym memlekettik organdar sheshýi tıis máselege bola memleket basshysyna beker júgingim kelmeıdi, bul áreketim úshin uıalar edim. Jalpy osy máselede basty jaýapkershilik kimge júktelgen? Quıryǵyn qımyldatqysy keletin jan bar ma? Álde qol astyndaǵy qyzmetkerlerdiń sapaly qyzmetin qamtamasyz ete almaı júrgen mınıstrler kináli me buǵan?

Memlekettik qyzmetkerler óz eliniń azamattaryn nege jek kóredi? Kómek surap kelgen adamnyń betin qaıtarýǵa uıalmaısyzdar ma? Bul suraqtardy sóılesýime múmkindik týǵan ár qyzmetkerge qoıdym. Alaıda jaýap ala almadym. Deı turǵanmen, uıalar...

Bul jazbam Qazaqstannyń memlekettik qyzmetkerlerine arnalady: sender qudaı emessińder, Alla – bireý. Ómir máńgi emes, bir kúni ólesińder, Allanyń aldyna barasyńdar. Sol kezde ne dep jaýap beresińder?

Óz jumystaryńdy adal atqaryńdar, sol kezde ǵana eldegi jaǵdaı túzeledi. Senderdiń ómirleriń de... Ár qazaqstandyq óz Otanynyń qurylysshysy, osyny túsinińder!

Aýdarǵan: Gúlim Jaqan