Kesheli –beri Venesýelada opozısıa men prezıdent Modýronyń jaqtastary kóshege shyqty. Ulttyq assambleıanyń basshysy Hýan Gýaıdo opozısıanyń qoldaýymen ózin prezıdent etip jarıalady. Olar qazirgi prezıdent Modýroǵa qysym kórsetip jatyr. El ishi ekige bólindi: biri Modýrony, ekinshileri Gýaıdony jaqtaıdy. Qaqtyǵystan 23 adam qaza tapqan. İshki tartysqa syrtqy kúsh te áser etip jatqany anyq. Tek alańdaıtyn bir nárse bar: Karakas kósheleri qanǵa boıalmasa, boldy. Hýan Gýaıdony AQSH, Kanada, Brazılıa, Argentına, Kolýmbıa, Perý, Chılı men Ekvador, sonymen qatar EýroOdaqqa múshe elder tolyq qoldap otyr. Al Modýroǵa dem berip otyrǵandar–Reseı, Qytaı jáne Túrkıa.

–Imperalısterdiń zulymdyq oshaǵy AQSH bizdiń eldi quldyqqa salýdy kózdep otyr. Sondyqtan olardyń aıtqany bolmaıdy, –dep málimdeme jasaǵan Modýro olardy 72 saǵattyń ishinde  elden ketýdi talap etti. Biraq AQSH bıligi keshe olardyń birqataryn qaýipsizdik úshin alyp ketetinin málim etti. Ulttyq assambleıanyń basshysy Gýaıdony jaqtaǵan Aq úı ony zańdy prezıdent retinde tanydy. Tipti AQSH-tyń memlekettik hatshysy Maık Pompeo Modýrony «eldiń burynǵy basshysy» dep te atap jiberdi. Soǵan qaraǵanda, AQSH Modýronyń bılik basynda qalǵanyn qalamaıdy. Buǵan qatysty Reseıdiń Syrtqy ister mınıstrligi óz kózqarasyn bildirdi: «Venesýeladaǵy jaǵdaı syrtqy kúshterdiń el isine ashyq aralasyp otyrǵanyn aıqyn kórsetip otyr. Olar Venesýelanyń táýelsizdigi men derbestigine qol suqty, el prezıdentin kúshpen qolmen aýystyrýǵa áreket jasady».

Prezıdent Modýro bıliktiń qoldan sýsyp bara jatqanyn sezse kerek, Reseıden áskerı kómek surady. Eger bul iske resmı Máskeý aralasatyn bolsa, onda halyqaralyq jaǵdaı tipti ýshyǵady. Sondyqtan ázirge Pýtınniń eli áliptiń artyn baǵyp otyr. Onyń da sebebi bar. Jalpy Venesýela maıdanyna Reseıdiń qatysqany tıimdi me?

Qazirdiń ózinde orys sarapshylary óz boljamyn aıtyp jatyr. Budan shyǵatyn qorytyndy: Reseı Karakas maıdanyna aralaspaýy tıis. Biraq barynsha Modýrony bılikte qaldyrýǵa tyrysady. Bul múmkin nárse me? Onsyz da Reseı Sırıadaǵy soǵysqa qyrýar qarjysyn jumsady. Sondyqtan endi «Venesýelada isine» áskerı kúshpen aralasýǵa múmkindigi de joq, áskerı qýaty da jetispeıdi. Bul jerde AQSH kúshti. Aq úı jalǵyz emes. onyń janynda qoldaıtyn 20-ǵa jýyq odaqtastary bar.

Onyń ústine Venesýelada jaǵdaı qıyn. Halqy kedeı, turmys aýyr. Ótken jyly 70 myńnan astam Venesýela halqy Braızılıanyń Roraıma shtatyna zańsyz kóshti. Sondyqtan kórshiles elderdiń barlyǵy da Modýronyń prezıdenttik bılikten ketkenin qalaıdy. Perý men Kolýmbıa da jańa prezıdentti jaqtaıtynyn málim etti. Demek, Modýronyń bıliginen mán ketti. El halqy ekige bólindi. AQSH prezıdenti Donald Tramp eger qandaı da bir el Modýroǵa  áskerı jaǵynan qoldaý kórsetetin bolsa, AQSH qarap qalmaıtynyn eskertti. Biraq másele áskerı kúshpen sheshilmeýi tıis. Ázirge jaǵdaıdyń qalaı órbıtinin aıtý qıyn. Modýro qysymnan saldarynan prezıdenttikten ketedi nemese elde azamat soǵysy bastalýy múmkin. Qalaı aıtqanda da, Latyn Amerıkasyndaǵy reseıshil el qıyn jaǵdaıda qaldy. Ázirge armıa Modýronyń jaǵynda, eger olar prezıdentin  qorǵaýdan bas tartsa, onda bitti.

Negizi, bul ishki saıası teketires qana emes, alpaýyt el múddeleriniń qaqtyǵysy bolyp otyrǵanyn da ashyq moıyndaýymyz kerek.