–Balam, beri kelshi, – dedim men qýanǵanymnan atyp turyp,–kınoǵa túskensiń be ne? Instagramda júrsiń ǵoı?
Balam jetip kelip, uıaly telefonyma úńildi de:
–İkke, kıno emes qoı, bóten mekteptiń úsh balasyn qatar turǵyzyp qoıyp, on shaqty synyptastarymyzben jabyla uryp tastadyq!
–Ákelshi betti, adam bolaıyn depsiń ǵoı? Myna jyǵylǵan balany tepkilep jatqan sen be?
–Men ǵoı áke.
–Adam bolý degen osy! Ákelshi betti! Úmmá, úmmá! Áı, mamasy? Mamasy!
Áıelim keldi. 
–Balamyz adam bolypty! Toǵyzynshy synypta júrip, «grýppovoı» tóbeleskke qatysypty! 
–Oıbýý, ras pa? Naǵashy jurtyna habarlap, súıinshi suraıyn! –degen áıelim uıaly telefonyn qulaǵyna jabystyrdy, –Áláý? Mama? Nemereńiz mektep aralyq jarysqa, oı, tóbeleske qatysyp, birinshi oryndy jeńip alypty! Ne deısiz? Halyqaralyq tóbeleske qatyssyn? Ondaı tóbeles joq qoı mama! Qatty qýanyp otyrmyz! Bizdiń tárbıe ǵoı, bizdiń! Ia, ıa, úndemeı, úıde júre berse qaıter edik? Aty shyqty! Ia, ıa, áleýmettik jeli arqyly balamyzdy búkil Qazaqstan tanyp jatyr! Bilim mınıstrliginen quttyqtap jatyr!
–Oıbaaı, myna jyǵylǵan balanyń ústine otyra ketken sen be? İshinen tepkilegen sen ǵoı? Qalaı, qaı jerinen tepkileýdi biledi bizdiń bala! –dedim men qýanyshym qoınyma syımaı. Bir kezde mektep dırektory kelip, qolymdy qysyp, silkilep turyp aldy:
–Sizdiń ulyńyz úlken erlik jasady! Mundaı jaǵdaı buryn–sońdy bolǵan emes! Qatty áser etti. Qýanǵanymyzdan butymyzǵa jiberip qoıa jazdadyq! Bizdiń mekteptiń abyroıyn asqaqtatqan balańyzǵa qarǵys... oı, alǵys gramotasyn alyp keldim! Ózimizdiń mekteptiń balasyn urmaı, bóten mekteptiń oqýshylaryn synyptastarymen jabyla uryp qulatqan ǵoı?! Bári jabylyp urǵan! Ne degen tatýlyq, ne degen birlik, ne degen yntymaq deseńizshi? Birigip urý degen– tatýlyqtyń belgisi! Bıylǵy jastar jyly osyndaı bolsa kerek!
Men mektep dırektoryn qushaqtaı aldym. Onyń kózderi kúlimdep, kádimgideı masaırap qaldy.
–Áke, tiline temekiniń shoǵyn bastym ǵoı! –dep masattandy balam. Dırektor onyń arqasynan qaqty. 
–Áke, sheshesinen boqtadyq!
–Ádebı tilde boqtaǵany qandaı jaqsy bolǵan! –dep dırektor odan saıyn maqtandy. 
–Ólip qalsa she? –dep qaldy áıelim.
–Oı, ondaı oqıǵalar kún ara bolyp jatyr emes pe? Polısıa degen keıbir sıyrdyń aldyna bir qapshyq jońyshqa, oı keshirińiz, aqsha tastaı salsaq, sony jeeep tura beredi olar, –dedim men. Ne kerek, bir kezde polısıa tergeýshileri kelip, biri qolymdy aldy.
–Tártipsizuly Buzyqbaıdyń ákesi siz be? –dep surady ol.
–Ia.
–Qutty bolsyn! Balańyz úshin kýrortqa otyz kúndik joldama aldyńyz!
Netken qýanysh, netken, baqyt, on kún boldy, túrmeniń tórinde demalyp jatyrmyn! Baqa bolsyn, basqa bolsyn, balamnyń arqasynda! Jasa, buzyqtar jyly!

Muhtar Sherim