Karakasta áli tolqý jalǵasyp jatyr. Shıelenisken jaǵdaıdyń qalaı aıaqtalaryn áli eshkim bilmeıdi. Bir elde  – eki prezıdent.

Opozısıa ókili, Ulttyq Assambleıanyń basshysy Gýaıdony AQSH, Argentına, Paragvaı, Kolýmbıa, Brazılıa, Kanada, Perý, Chılı, Ekvador, Kosta-Rıka,  Grýzıa jáne birqatar Eýropa elderi moıyndady. 
Al  Ýrýgvaı, Bolıvıa, Meksıka, Qytaı, Túrkıa, Iran, Salvador, Kýba jáne Reseı burynǵy saılanǵan basshy Nıkolas Modýrony prezıdent retinde tanyp otyr.

Keshe AQSH ashyq qoldap otyrǵan kandıdat Gýaıdo «Vashıntonǵa jasyryn baryp qaıtty» degen aqparat shyqty.

Nıkolas Modýro ózin ekinshi prezıdent retinde jarıalaǵan Gýaıdony jeke kezdesýge shaqyrdy.  Biraq ol kezdesýge  bara qoıady deý qıyn.

Anglıanyń birqatar banki elde saqtalǵan Modýronyń 1,2 mıllıon dollar altyn quımalaryn berýden bas tartty. Endi dúnıe júzinde basqa memleketterde tyǵylǵan Modýronyń baılyǵy buǵattalatyn shyǵar.

Biraq jýrnalıserdiń aldynda baspasóz máslıhatyn ótkizgen Modýro Konstıtýsıanyń ár baptaryna toqtalyp, ózin eldiń prezıdenti ekenin taǵy shegelep aıtty.

Ázirge armıa men polısıa – Nıkolas Modýronyń jaǵynda.

Keshe Reuters aqparat agenttigi Reseı «álemniń «ystyq núktelerinde» júrgen orystyń 400 jaldamaly jendetin  Modýrony qorǵaý úshin Venesýelaǵa jiberdi» degen aqparat taratty. Alaıda Reseı prezıdentiniń baspasóz hatshysy Dmıtrıı Peskov muny joqqa shyǵardy. Biraq birqatar batys baspasózi bul aqparatty rastap otyr. Al anyǵyna kelgende, osydan tórt-bes kún buryn Nıkolas Modýronyń Pýtınge telefon shalyp, áskerı kómek suraǵany ras.

Reseı baspasóziniń basym bóligi Venesýelany jaqtap, maqala jazýda. Bul da túsinikti jaǵdaı. Osy ýaqytqa deıin orystar burynǵy prezıdent Ýgo Chaves pen Modýro júıesin saqtap qalý úshin Venesýela ekonomıkasyna 17 mıllıard dollar quıdy degen derek bar. Reseıdiń jany shyǵyp jatqanynyń da syry osy.

Al  AQSH qoldap otyrǵan Hýan Gýaıdo kim? Ol qarapaıym otbasynan shyqqan 35 jastaǵy azamat. Stýdent kezinen belsendi bolǵan.Ákesi - ushqysh, anasy - muǵalim. Turmystyń aýyrlyǵynan ol ýnıversıtetke kesh túsedi. Burynǵy prezıdent Ýgo Chaveske qarsylyq retinde stýdentter qozǵalysyn qurǵan. 2009 jyly  «Halyq erki» partıasynyń kósemi  Leopold Lopesti Ýgo Chaves bıligi 13 jylǵa sottap jibergennen keıin ol partıanyń basshysy bolyp saılanady.  Venesýelanyń Ulttyq Assambleıasyn jyl saıyn bir partıa kezektesip basqaryp otyrady. Bıyldan bastap, assambleıany basqarý «Halyq erkiniń» basshysy Hýan Gýaıdonyń enshisine tıgen. Onyń baǵyna halyq tolqýy ulasyp, endi ózin ol eldegi ekinshi prezıdent etip jarıalady.

...Al álem Karakasqa kóz tigip otyr.