UFC chempıony Habıb Nurmaǵamedov Qaraǵandydaǵy balalar úıine baryp, balalardyń armanyn oryndady dep jazady Qamshy.kz aqparat agenttigi.
Osyǵan deıin Habıb Nurmaǵamedov qaraǵandylyq jigittiń armanyn oryndap, Qaraǵandyǵa baratynyn aıtqan. Ol keshe Qaraǵandydaǵy "Tańsholpan" balalar úıiniń tárbıelenýshilerimen kezdesti.
Habıbty qonaqqa shaqyrǵan Aleksandr esimdi jigittiń aıtýynsha, chempıon ózine erekshe nazar aýdartqysy kelmegendikten aldyn ala eskertýsiz, jasyryn túrde kelgen. Tipti onyń keletinin 20 mınýt buryn ǵana bilipti.
♦Habıb Nurmaǵamedov 26 jastaǵy qaraǵandylyqtyń armanyn oryndady (foto)
Habıb balalar úıiniń tárbıelenýshilerin sportpen aınalysýǵa shaqyrǵan. Sondaı-aq chempıon Aleksandrdyń anasynyń dúkenine baryp, tanysyp, shokolad alǵan.
"Men qazaqstandyq tanymal juldyzdarǵa balalar úıiniń tárbıelenýshilerimen kezdesip, olarǵa "aqyl-keńes aıtyńyz", dep birneshe ret shaqyrtý jasaǵanmyn. Alaıda kóbisi meniń usynysymdy qabyl almady. Kelgisi kelmedi. Áke-sheshesi joq balalar úshin tanymal adamdarmen kezdesý arman ekenin bilesizder me? Olarmen kezdesý olardyń shabytyna shabyt qosyp, jaqsy adam bolýyna zor yqpalyn tıgizer edi. Bóten bala deýge bolmaıdy. Sebebi bári bizdiń balalarymyz, baýyrlarymyz. Men olarǵa ózimniń baýyrlarym, qaryndastarym retinde qaraımyn. Balalardyń ómirin jaqsartyp, aıaqtaryna nyq turǵanyn qalaımyn", deıdi Aleksandr Korogodov.
Daıyndaǵan: Ásel Bolatqyzy
