27 qańtar – Túrikmenstannyń Otan qorǵaýshylary kúni. Keshe osyǵan oraı prezıdent Gýrbangýly Berdimuhamedov eldiń áskerı qarýly kúshteriniń qyzmetkerlerin quttyqtap, olardyń birqatarynyń shenin ósirdi.

Mysaly, memlekettik shekara qyzmetiniń bastyǵy Shadýr Dýrdyev general-maıor ataǵyn aldy. 2018 jyly prezıdent Berdimuhamedov eki ret qatań eskertý jasaǵan Atadýrdy Osmanov ta osy joly  general-maıor shenine ıe boldy. Sondaı-aq Ádilet, prokýratýra, keden,  quqyq qorǵaý salasynda jumys isteıtinder de birshama marapat aldy. Olardyń da shenderi kóterildi.  

Biraq bizdi tańqaldyrǵan nárse bul emes, prezıdenttiń aldynda tize búgip, bas uryp, bas ıip, qurdaı jorǵalaǵandardyń áreketi boldy. Olardyń eshqaısysy da, áskerı tártippen qasqaıyp baryp, shekesine qolyn aparyp,  Bas qolbasshydan marapatyn nemese bolashaqta ıyǵyna taǵatyn taǵatyn shenin ala almaıdy. «Túrikmenstanǵa qyzmet etemin» dep te aıta almaıdy.  Olar qarapaıym sarbaz, meıli general bolsyn, tizesin búgip, basyn ıip, ardaqty qamqorshy «Arkadagtyń» bergen marapatyn mańdaıyna basýy tıis. Olar Otanǵa emes, prezıdentke qyzmet etedi.

Jeke basqa tabynýdyń soraqy úlgisin kórsetip jatqan Gýrbangýly Berdimuhamedov qolpashty jany súıedi, jaǵympazdyqty jaqsy kóredi, onyń árbir sózine zalda otyrǵandar toqtaýsyz qol shapalaqtaýy tıis. Áıtpese, bolmaıdy! Jaqpaı qalýy múmkin nemese muny istemegen adamnyń tuqymy tuzdaı qurıdy. Sol úshin prezıdenttiń aldyna barǵan adam qurdaı jorǵalap kelip, basyn ıedi, tizesin búgedi, bergen marapatyn mańdaıyna tıgizedi. Zaldy otyrǵandar «Uly Joǵary Bas qolbasshynyń dańqy arta bersin!» dep aıqaıdy salady. Aıtpaı kór, aıqaılamaı kór!

...Berdimuhamedovtyń aldynda basyń ıilmese, basyń ketedi!