Qamshy.kz aqparat agenttiginiń tilshisi 2 aqpan kúngi túnde Jánibek Álimhanulynyń besinshi jekpe-jegi qarsańynda boksshynyń Almaty oblysy, Alakól aýdany, Jylandy aýylynda turatyn anasy Záýre Saıynqyzyna telefon soǵyp, eksklúzıvti suhbat aldy.
- Amansyz ba? Sizge Almatydan «Qamshy» saıtynan habarlasyp turmyz. Tańerteń ulyńyz aıqasqa shyǵady. Kóńil-kúıińiz qalaı?
- Kóńilim ornynda. Balamnyń urysyn taqymdy qysyp, tosyp otyrmyn.
- Qobaljý, ýaıym bar shyǵar?
- Ózegińdi jaryp shyqqan balańdy ýaıym qylasyń. Biraq qorqynysh joq. Alysta júrgenine janym aýyrady.
- Keı analar ulynyń boksyn kórgisi kelmeı, teledıdardyń aldyna jolamaıdy. Siz bul jaǵynan qalaısyz?
- Men Jánibektiń Qazaqstandaǵy jarystaryna baryp turamyn. Astanadaǵy, Almatydaǵy boksyn kózimmen kórdim. Sondaı aýyr syndarda ulymnyń qasynan tabylǵandy jaqsy kóremin.
- Jánibek, búgin habarlasty ma?
- Sizden sál buryn telefon shaldy. Jaǵdaıym jaqsy. Salmaǵymdy ólshedi. Bári qalpynda, ýaıymdama, dedi.
- Erteń tańerteńgisin úıge jankúıer aǵaıyndar keletin shyǵar.
- Aǵaıyndar, aýyldastar Jánibektiń boksyna qatty asyǵyp júr. Keletin adamǵa esigimiz árqashan ashyq.
- Ulyńyzdy saǵyndyńyz ba?
- -Saǵynǵanda qandaı!
- Oqýy qalaı edi?!
- Sportshylardyki qalaı bolýshy edi?! Ortasha...
- Jánibektiń otbasy qaıda turyp jatyr?
- Kelinim Ánel, úsh balamen – Almatyda. Jánibektiń úlkeni Asyljan meniń qolymda. Osy Jylandyda úshinshi synypta oqıdy. Ulym men kelinimniń Asyljan, Ramazan, Sabyrjan atty úsh uly, Aızada degen bir qyzy bar.
«Ánel men nemerelerim Jánibek qashan Amerıkaǵa alyp ketedi» dep asyǵyp júr. Múmkin, osy aıqastan keıin olar Amerıkaǵa barýy múmkin.
- Jánibektiń Alakóldiń baýyryndaǵy shaǵyn ǵana Jylandy aýylynan ekenin bilemiz. Ondaǵy kásibińiz ne?
- Dene shynyqtyrý páninen muǵalimmin.
- Ulyńyzben birge túsken sýretińiz bolsa, «Qamshynyń» betinde jarıalasaq pa dep edik...
- Qansha jarysyna baryp júrip, Jánibekpen sýretke túspeppin. Jalpy, sýretke túskendi unatpaımyn. Degenmen, Alla qalasa, kelesi kelgeninde balammen sýretke tússem degen oıym bar.
- Alla jazsa, tańerteń Jánibek senimdi aqtaıdy dep úmittenemiz. Aman bolyńyz!
- Ámın, aıtqanyńyz kelsin! Almatydan ádeıi telefon soǵyp, tilektestik bildirgen sizderge de analyq alǵysymdy bildiremin. Meniń ulyma tileýles bolǵandaryńyz úshin myń da bir rahmet!
-Suhbatyńyzǵa rahmet!
